فرق طموحات سعادتك

1995

الاب:نفسك تطلع ايه يا احمد؟

أحمد:نفسى اطلع ظابط يا بابا

2007

الاب:نفسك تطلع ايه يا احمد؟

أحمد:نفسى اطلع ظابط ومعايا موبايل بكاميرا

مانشيتات يوم القيامه

جريدة الجمهورية

لبيك اللهم لبيك..وعد فأوفى.. رسول الله يشفع للمسلمين

جريدة الأسبوع

أسرار المؤامرة الصهيونية الأمريكية لإلغاء يوم القيامة

سعد الدين ابراهيم يعترف بأن إبليس موله للتشهير بمصر

جزء من مقال تخيلى عن مانشيتات يوم القيامه بنفس العنوان

http://masr.20at.com/newArticle.php?sid=12550

تفاهه

تفاهه
الوصول الى اختصار لهذا المعنى الواسع امر صعب لكن نحاول

التفاهه الفرديه
سيادتك دى بمجهود فردى يعنى تلقائيه كده ودى تتمثل بقى فى الناس اللذيذه اللى لازم تعرفك الموبايل بتاعها ذاكرته قد ايه لما تسمعك كل الاغانى اللى عليه وانت راجع تعبان من شغلك أو جامعتك وربنا كرمك وركبت جنبه الميكروباص
ده غير بقى مهاويس النجوم ونظره لشريط الشات هتشوف نورمن السعوديه مجنونه عمرو دياب وأكرم من مصر مجنون ديانا حداد الى جانب جنان من الكويت اللى صرفت ميزانية دوله على رسائلها لتاكد ان اليسا احسن صوت فى الوطن العربى
وطبعا هناك تفاهة حوارات بعض البنات فى الميكروباصات والكلام عن موضوعات خطيره مثل نوع المسكره التى استخدمته احداهن واثبت كفاءه عاليه او عن صديقتها التى تمت خطبتها امس
ما ذنبى لأعرف كل هذه الاخبار

تفاهه منظمه

أما التفاهه المنظمه والتى ترعاها جهه معينه او يشترك اكتر من شخص فى تنفيذها مثل رنات التليفون التى تحمل اسماء الاشخاص وتشوف الاعلان بتاعها كأنهم جابوا التايهه او شرائط الشات التى تمر فى اسفل القنوات وتحمل الكثير من التفاهات وهناك ايضا التافهين الذين جعلوا من موهبه عاديه فى مصر ملايين غيرها لم يسمع عنها احد تحول بسبب هذه التفاهه الى اسطورة الجيل على رأى ميشيل نبيل صحفى الدستور (فنان متعدد المواهب بيمثل ويألف ويغنى ويربى شعر صدره)

الى جانب طبعا الاخوات والاخوه المتصلات بأمير القلوب المعذبه ومداوى الجراح العاطفيه دكتور اسامه منير

نلحق نتكلم قبل رمضان...بنات مصر انضربوا يا رجاله

يلاحظ اى شاب حباه الله نعمة التركيز ما أصاب فتيات مصر-شفاهن الله-من حمى الميك اب والآى شادو والمسكره وغيرها مما ملأ علب المكياج حتى اوشكت بنات نفرتيتى وكليوباترا وحتشبسوت ان يصبحن نسخه بالكربون هى فى النهايه انثى بلا ملامح تحاول ان تبحث عن مسام بشرتها الى ان يعييك البحث ولن تجدها

حتى فى السينما لن تجد الا عدد ضئيل جدا لا يتناسب مع غرائز اى شاب حاسس بشبابه

مالذى حدث؟؟؟؟؟

من بعد سعاد حسنى وشاديه ومريم فخرالدين وشويكار وصباح وهند رستم فى العهد القديم

وميرفت امين ونجلاء فتحى ونورا وشمس البارودى فى الجيل اللى بعده

تصبح نجمات السينما علا غانم ونيللى كريم وداليا البحيرى ومى عزالدين وزينه

بالذمه مش حرام

نيللى كريم اخرها تعمل اعلان لمحلول الجفاف

وداليا البحيرى مش عارف كانت عارضة ازياءازاى بصراحه

اما علا غانم ما اظنش انه فيه واحد مكتوب له فى البطاقه ذكر بيحبها

ومى عزالدين وفضيحة النفخ

نفخ ايه امال قبل النفخ كانت ازاى

وزينه...الله على زينه

نفسى الاقى فى شكلها دليل واحد على الانوثه

حتى فى الشارع حاول ان تبحث عن انثى رقيقه

حولهن المكياج الى صور تسىء الظن بها بدون قصد

عارف ان كل بنت هتقول اهم حاجه الجمال الداخلى والجوهر افضل من المظهر وعلى راى احمد السقا لا عندهم لاجمال داخلى ولا خارجى

على اى اساس يعنى بيهتموا بالجمال الداخلى

منشغلين بمناهضة العولمه مثلا ولا الدراسه شاغله كل تفكيرهم

وترجعوا تزعلوا وتقولوا نعطى فرصه لبنات من نبت الارض الخضرا ومفيش فيكن فايده

لذا الشباب قرر انه يلجأ للاستيراد سواء من بلاد الفرنجه او من اشقاءنا اللبنانين ربنا يخليهم

بالذمه فيه واحده عاوزه تبقى جميله تسمع نصائح امينه شلبايه

كانت نفعت نفسها

هنعمل ايه

كنا هنعمل ايه من غيرك

ده احنا شبعنا سنين من خيرك

اسف يا جماعه على ان البيتين قصيرين لكن الموقف العصيب قيد لسانى ومقدرتش اكتب غير دول والله وما لكم عليا حلفان اول مره الشعر ينفجر كده على لسانى

مستغرب من الشعب اللى الجرأه خلته يطلع اشاعه زى دى

طيب ولو حصل

هنعمل ايه فى المدارس اللى باسمه

والصور اللى فى الشارع دى

والمكتبات

والجناين

ومحطات المترو

ده حتى بلدنا ممكن يجى لها برد لو اتكتبت لوحدها

؟؟؟؟؟؟؟؟؟

عيب

ده البركه بتاعتنا

الحياه حلوه ..عيشها من القلب...مع الاعتذار لشبكة الحاجه ام نبيل

فى البدايه اعتذر عن الغياب هذه المده الطويله ..ماذا ؟ من انت اصلا..ياله من حرج
حسنا الافضل ان نتجاوز هذه النقطه وندخل فى الموضوع ...نتكلم اليوم عن نجوم الضحك الجدد...ملوك القفشات الذين اتحفونا هذا الصيف بروائع جديده ...عن الوزراء الجامدين نتحدث..هؤلاء المخلصين (من الاخلاص والتخليص)الذين يستمتعون الان على شواطىء مارينا بعد ان اطمأنوا على انهم انهوا واجبهم فى الاجهاز على اخر امل للشعب فى عيش افضل .لكنهم منحوه الكثير من الضحك فى المقابل
عدد المصرى اليوم 17/7/2007كان زاخرا بهذه القفشات .أول افيه كان لوزير الزراعه الذى كلفه الرئيس
بحماية حديقة القصر الرئاسى -اه مش الجنينه بتاعة قصر القبه مهدده بالتصحر-وده طبعا مش لان الميه قاطعه عند الريس حاشا وماشا ولكن لارتفاع نسبة المياه الجوفيه ولما شعر الرئيس بالحرج من ملاحظات بعض الرؤساء الضيوف-يعنى مش احنا الى لاحظنا

بدأنا نتحرك لانقاذ الحديقه ...هى دى مصر فعلا..المثير فى الامر انه كشف ان الرئيس لا يعيش بمعزل عن الشعب بل يشاركه معاناته فالخبراء اكدوا ان السبب فى الحدث هو انخفاض مستوى القصر عن الاحياء المجاوره وده اللى بيخلى المياه ترجع منها على القصر ودى كمان مش ميه نظيفه دى مياه صرف صحى -يالهوى-شايفين الرئيس مستحمل ايه؟؟ وأنا اطالب بابادة الاحياء المجاوره او على الاقل تهجيرها ..دى سمعة مصر يا جدعان

القفشه التانيه كانت لوزير الزراعه أيضا-والله دمه خفيف-الذى أقال مدير حديقة الحيوان بسبب مقتل الناقه المغربيه الثانيه فى فتره قصيره والحادث كما يروى التقرير أن هناك قاتلا يتسلل فى هدوء تام وبرغم يقظة الامن الهمام ليذبح الناقه فى الظلام ..يا سلام ...بعدين يقعد فى استمتاع ليشفيها وياخد الفخدتين اللى قدام ..المره اللى فاتت خد فخده واحده بدأ يطمع

وفى هدوء تام ينط من على السور وهو شايل حوالى 100كيلو جرام فى هدوء تام ومن بجاحة عينه ينط من جنب نقطة الشرطه ويهرب...اه نسيت ..فى هدوء تام

المدير الجديد قال ان الامر اما مؤامره مما يعنى ان يشك فى جبهة البوليساريو المناوئه للمغرب وراء الحادث أو رما هو ثأر على الناقه أو ان السحر والشعوذه وهو الاحتمال الثانى فى رايه هو السبب وبالطبع معروف ان فخد الناقه المغربيه وجناح الصرصور الازرق هما الاساس لفك اى عمل

القفشه الاخيره لليوم من نصيب وزير البيئه ...الذى فاجأنا بهذا التصريح

ارتفاع نسبة الرصاص فى الهواء ونحذر من التعرض له

ولم يخبرنا بالطريقه العبقريه التى سنمتنع بها من التعرض للهواء ...فى داخل الخبر يؤكد ان الرصاص يدخل المنازل من الابواب واطاراتها والنوافذ ومجراها والسلالم والاركان والاماكن العاليه والحوائط الداخليه والخارجيه للبيت ويحذر من التعرض له والى ان اجد المكان السحرى فى المنزل الذى ابتعد به عن هذه المناطق اترككم فى نوبة الضحك التى تمرون بها ..مع انه والله كان لسه فيه قفشه جامده موت لوزير الاسكان والاستثمار و...لكن كده كفايه ...لا بلاش كفايه لنروح فى داهيه

كتبها زويل

فاجئتنى شيرين

محض خيال

مشربتش من نيلها؟؟؟؟

لا ....اصل انا من البرلس والميه قاطعه عندنا

جمال مان ......بقلم زويل

عاوز أسألك سؤال.... لو جتلك فرصه تكون واحد من الرجال الخارقين تحب تكون مين؟يعنى مثلا واحد صاحبى اخوه الصغير نفسه يكون سوبر مان علشان (يتبول)على الناس من فوق(هو الصراحه قال كلمه بيئه عن كده).واحد نمس من أصحابى أختار سبيدر مان علشان يفضل لازق على سطح عماره وراقم المزز واللى تعجبه يلزقها واحد نسيج عنكبوتى يخطفها وانت عارف بقى واحد ظريف تانى اختار يكون بات مان على اساس انه (يابخت من بات مان ولا باتش ومان)انت بقى .....تختار مين؟؟؟مالك متنح كده؟؟؟؟؟أيه انت اصلا متسمعش عن دول ؟ حاجه غريبه ....ده انت غريب قوى يامان طيب ايه رايك فى ادهم صبرى هو ده البطل المحلى الوحيد .وطبعا لأنه مصرى (ومصر يا أول نور فى الدنيا ..وكده)ضرب كل الناس .وفى كل مكان .ده حتى هزأ كوندليزا رايس متعرفوش؟.....على كده بقى متعرفش نورالدين محمول ؟اللى بيحل الالغاز وأول ما يحل لغز عينيه بتنور ولو مشغله على وضعsilentيعطيك viberationبص بقى انت غلبتنى وياك وعلشان كده هقولك على واحد لو معرفتوش هتروح فى داهيه .ايه رأيك تبقى زى حبيب قلبنا جمال باشا بيه مبارك ...ده بقى راجل خارق على حق .ده ابن الرئيس يامعلم يعنى يضرب الارض لو مطلعتش بطيخ من غير بذر يفجروها ....يروح مجلس ادارة بنك البنك يفوز بكل الصفقات ...يمسك شركه لتداول الاوراق الماليه(مش عارف يعنى ايه .بس هو عنده واحده)تتقلب بقدرة قادر لأكبر شركه فى المجال ده .خارق خارق يعنى ...وكل الحكايه خطوتين ويبقى رئيس بعد عمر طويل باذن الله ...وعلشان أؤكد لك ان جمال مان زى سوبر مان وأحسن كمان ...شوف انت لو سوبر مان راح بلده كريبتون هيفقد قواه الجباره ويتحول لسوبر فرط أى عيل هفأ يضحضحه انما جمال مان لا يكتسب قواه الجباره الا فى ارض الوطن .....سوبر مان بقى رمز الشعب الامريكى لانهم اختاروه يبقى كده ...جمال مان بقى هيكون رمز مصر بمزاج الشعب أو غصب عن اللى جابوه ....سوبر مان ميقدرش يتكلم فى السياسه ..جمال مان ايه بقى !!!!!!بيتكلم فى الموازنه وخطه الحكومه مع ان ملوش دعوه بيهم بس راجل خارق بقى ...ده يارجل اتعملت له تعديلات ستوريه لحوالى 1/4الدستور ...وكمان مبيروحش اى حته الا ومعاه 4وزراء على الاقل ......سوبر مان أخره يحب من بعيد لبعيد انما جمال مان أثبت انه مان على حق مش نص لبه سوبر زى التانى وخلاص هيكمل نص دينه فى 4/5 الجاىالمهم..... الحق اخلع يا مان قبل ما ييجى واحد خارق من بتوع امن الدوله ويخلينى من الرجال المخروقين

تم كتابة اسم السيد جمال مبارك بالاخضر ليتناسب مع لون الفجل الجديد

سلطه .....قطعها لكم زويل

أتعرف ذلك الشعور عندما تريد ان تكتب أى شىء لتفرغ مابداخلك من طاقه؟ ....أى شىء وبدون هدف أو موضوع محدد ..حسنا ذلك هو الشعور الذى يتملكنى الان .فى ماذا سأكتب ...امممممم.مارأيكم فى التعديلات الدستوريه ؟ماذا؟(هيا ناقصه سد نفس)ليه يا جماعه ؟؟؟أنا شايف ان التعديلات دى كويسه جدا بل هى من لطائف القدر بنا ..ألم يكن القدر رحيما حين جعل التعديلات تشمل 34ماده بس مش الدستور كله (كنا رحنا فطيس)ألم يكن القدر رحيما بنا حين جعل فى مناقشى التعديلات سيده مثل (د/آمال عثمان)التى وقفت كألف رجل مضحية بتاريخها(الوطنى)بأكمله من اجل عيون مصر وقفت تنتقد راى الرئيس وقد استطاعت بعون الله ولطفه علينا ان تحول تلك اللحظه (الفاصله)الى نقطه اصابت المصريين جميعا

طب أقولكم حاجه احلى ايه رايكم فى موضوع التنظيم الشيوعى السرى اللى اعلنت عنه المصرى اليوم فى عدد3أبريل-شفت السريه؟؟-تسال المحرره الضيف صاحب المفاجأه فيه تنظيم سرى؟يقولها أيوه.... طب ادينا معلومات عنه ...يرد عليها لاتعليق(علشان السريه ياأخى)على اساس ان لو فيه تنظيم بجد ومضايق الحكومه وعايزاه يقر باسماء اعضائه بل وماركه ال(underwear(بتاعهم مش هتعرف مع اول قفا .واحلى حاجه فى سرية الموضوع ان الضيف ساب ورق التنظيم (السرى)خدبالك ...على الترابيزه وراح الحمام فبالصدفه المحرره شافته وعرفت كل حاجه .السريه دى بتفكرنى بحاجه تانيه الناس مصممه برضه انها سريه مع ان كل الشباب عارفها ومجربها وبيعملوها علانيه فى المدرسه ساعات ...المهم تسال عملت ياعم التنظيم السرى ايه ؟ يقولها اضرابات العمال ..بس ياسيدى والعمال بعد كده هيطلع عين و(...)اللى جابهم بعد كده فى اى اضراب وطبعا محدش هيدافع عنهم دول شيوعيين ولاد(....)

طب اقولكم على حاجه حلوه قوى ماتيجى نحكى حكايه كرويه ...كان يا ما كان .كان فيه فريق اسمه (الزمالك)بيقولوا انه كان فريق جامد ..على ما اظن كان فى عصر اكتشاف النار..وبعدين الناس اللى فيه اتخانقوا مع بعضهم فالفريق احواله باظت .ومعرفش طعم اى بطوله من ساعتها _مش عارف ده كان بعد طوفان سيدنا نوح بسنتين ولا اربعه .وبغض النظر عن خسارته المعتاده من الاهلى -لانه مش عيب وطبيعى جدا-بقى بيخسر من طوب الارض ..بس بيقولوا ان الاوضاع هتتحسن فى القريب العاجل وانا حاسس ومفيش حاجه بعيد على ربنا ان الزمالك هيكون تانى نادى -كالعاجه يتاهل لكاس الكون للانديه اللى هتقام فى المريخ وللا بلاش المريخ ليفتكروه السودانى اللى بيعملهم حساسيه

سيبك بقى من الغم ده وتعالى نفرح شويه مش حبيبنا (جمال مبارك)نجل الرئيس هيتجوز يوم 4مايو ..أيوه ياسيدى ما كنش اتجوز لدلوقتى وحفل الزفاف هيبقى فى شرم الشيخ .....ياسلالالالالالالالالام ....هو ده التواضع وهى دى الوطنيه بيشجع السياحه وبيوفر مصاريف كانت هتبقى من ميزانية البلد .انا فرحان له قوى -بجد مش تريقه -بس ليا سؤال بسيط هى محافظة الدقهليه هتكفى اهل سيناء والقناه اللى هيهجروهم كترتيبات امنيه طبعا لتامين الفرح؟؟؟؟؟؟؟؟

عالعموم يجعله عامر وعقبال البكارى ياحبيبنا

سلطه قطعها لكم زويل

التخديلات الدستوريه..طبق اليوم.....مفروس افندى

التخديلات الدستوريه

انتاج المطبخ السياسى المصرى

التاريخ 16/3/2007

الطهاه العائله الحاكمه وحاشيتها

المقادير

كثير من البهاله

مقدار معقول من الأونطه

ملعقتين استبداد

كوب توريث

فنجان كبير كبت حريات

طريقة التحضير

مطلوب ناس نايمه وسلبيه .دول اللى هيأكلوا الطبخه

مجموعه من رجال القانون يقف ابليس متواضعا أمام عبقريتهم

جهاز أمنى فهمه على قده ...ينفذ وبس

اخلط هذا المقدار ببطء يطلعلك ناس مفرومه بنكهة التعديلات الدستوريه

النتيجه

هذه التخديله لها قدره عجيبه على تغيير الاشياء تقدر تنقلك فى لحظه من بيتك الى منتزه طره وكان الله بالسر عليم

كما أن لها تأثير كبير على المراه بقدونس الحياه تحشرها فى كل حاجه لما ممكن يطلع لها شنب فى الاخر من كتر المساواه

الآثار الجانبيه

يصاحب هذه التخديلات بعض الهلاوس ..يعنى ممكن تاكلها النهارده وانت بيحكمك واحد اسمه محمد تصحى الصبح تلاقيك بيحكمك واحد اسمه جمال

فى كل أكله يقول الطهاه بالهنا والشفا لكن للأسف فى أكلتنا دى الطهاه قالوا بال......الهارى

بيبى هيفا.....................بقلم زويل

طبعا اذا كنت سيادتك من متابعى أخبار هيفاء وهبى زى اى شاب عنده غرائز هتعرف معنى العنوان ده .اما اذا كنت سيادتك مش من متابعيها -مش معنى كده انك ملكش غرائز-بالتأكيد بتابع اليسا أو نانسى ...ربنا يخلى لبنان

العنوان ده مش معناه ابن هيفا .الموضوع ان هيفا قررت تقتحم عالم الاطفال بألبوم غنائى -على حد كلامها-ده عنوانه.علشان تربى الجيل ده صح على ايديها وحتى تضع لهم القدوه والمثل فالبنات يعرفوا يرقصوا والولاد يجيلهم بلوغ مبكر

وأنا احب ابشرالعيال ان زمن المذيعه العجوزه ومايطلبه الاطفال والعبط ده انتهى خلاص وسلم لى على ارقص لى يافيل يا ابو زلومه ...فيل ايه اللى يرقص وعندنا هيفا ودومينيك ومروى اللى قرروا يقتحموا المجال ده برضه..كمان ايه القرش ده؟ -واضح ان الاغنيه دى كانت قبل الثوره-وزمن صفاء ابو السعود وياصحابى وصحاباتى خلص تماما ولافرشه سنان ولاصابونه بتزفلط ..الصابونه فى الموضه الجديده ليها استخدامات تانيه خالص...وقبل ماتفكر غلط المطربه هى اللى هتستخدمها علشان تعرف الطفل ازاى يستحمى ..آسف ياخد شاور

الاغنيه اللى عجبت هيفا جدا وقررت اعادة غنائها هى أغنيه انا ابريق الشاى ولكن مع بعض التعديل فاصبحت كلماتها

أنا أبريق الشاى ...بوزى كده .مع حركه راقصه وابراز جزء من الجسد يشبه البوز اسما ومعنى ....كده وحركه اخرى وكلمه لا استطيع ذكرها فنحن لسنا فى مقال ثقافى...وأعرف برضه ياوظاويظ ارقص استربتيز

ونحن من مدونتنا هذه نوجه تحيه عميقه معطره بالحب لهيفا واخواتها على مجهودهم الكبير فى تنميه عقل الطفل العربى وفى انتظار البومها الذى سيجمع الكبار والصغار امام برامج الاطفال

كان نفسى أطلع تافه...... من يوميات مفروس افندى

نعم ..هى احدى لحظات يأسى ..دبت فى عقلى هذه الأفكار
ليه ماكنتش ميمى؟ أو توتو؟ أو طلعت مطرب شعبى حقير يغنى للمخدرات فتصفق له الجماهير؟ اوطلعت لاعب كره لا احقق شيئا ومع ذلك لى كل التقدير المادى والمعنوى؟
ليه طلعت مدرس محترم ومكنتش سباك محترم ؟ مش كنت سلكت أمورحياتى
مفروس افندى
مفلس بالتربنه والتعتيم
أقصد مدرس بالتربيه والتعليم