Tuesday, April 10, 2007

سلطه .....قطعها لكم زويل

أتعرف ذلك الشعور عندما تريد ان تكتب أى شىء لتفرغ مابداخلك من طاقه؟ ....أى شىء وبدون هدف أو موضوع محدد ..حسنا ذلك هو الشعور الذى يتملكنى الان .فى ماذا سأكتب ...امممممم.مارأيكم فى التعديلات الدستوريه ؟ماذا؟(هيا ناقصه سد نفس)ليه يا جماعه ؟؟؟أنا شايف ان التعديلات دى كويسه جدا بل هى من لطائف القدر بنا ..ألم يكن القدر رحيما حين جعل التعديلات تشمل 34ماده بس مش الدستور كله (كنا رحنا فطيس)ألم يكن القدر رحيما بنا حين جعل فى مناقشى التعديلات سيده مثل (د/آمال عثمان)التى وقفت كألف رجل مضحية بتاريخها(الوطنى)بأكمله من اجل عيون مصر وقفت تنتقد راى الرئيس وقد استطاعت بعون الله ولطفه علينا ان تحول تلك اللحظه (الفاصله)الى نقطه اصابت المصريين جميعا
طب أقولكم حاجه احلى ايه رايكم فى موضوع التنظيم الشيوعى السرى اللى اعلنت عنه المصرى اليوم فى عدد3أبريل-شفت السريه؟؟-تسال المحرره الضيف صاحب المفاجأه فيه تنظيم سرى؟يقولها أيوه.... طب ادينا معلومات عنه ...يرد عليها لاتعليق(علشان السريه ياأخى)على اساس ان لو فيه تنظيم بجد ومضايق الحكومه وعايزاه يقر باسماء اعضائه بل وماركه ال(underwear(بتاعهم مش هتعرف مع اول قفا .واحلى حاجه فى سرية الموضوع ان الضيف ساب ورق التنظيم (السرى)خدبالك ...على الترابيزه وراح الحمام فبالصدفه المحرره شافته وعرفت كل حاجه .السريه دى بتفكرنى بحاجه تانيه الناس مصممه برضه انها سريه مع ان كل الشباب عارفها ومجربها وبيعملوها علانيه فى المدرسه ساعات ...المهم تسال عملت ياعم التنظيم السرى ايه ؟ يقولها اضرابات العمال ..بس ياسيدى والعمال بعد كده هيطلع عين و(...)اللى جابهم بعد كده فى اى اضراب وطبعا محدش هيدافع عنهم دول شيوعيين ولاد(....)
طب اقولكم على حاجه حلوه قوى ماتيجى نحكى حكايه كرويه ...كان يا ما كان .كان فيه فريق اسمه (الزمالك)بيقولوا انه كان فريق جامد ..على ما اظن كان فى عصر اكتشاف النار..وبعدين الناس اللى فيه اتخانقوا مع بعضهم فالفريق احواله باظت .ومعرفش طعم اى بطوله من ساعتها _مش عارف ده كان بعد طوفان سيدنا نوح بسنتين ولا اربعه .وبغض النظر عن خسارته المعتاده من الاهلى -لانه مش عيب وطبيعى جدا-بقى بيخسر من طوب الارض ..بس بيقولوا ان الاوضاع هتتحسن فى القريب العاجل وانا حاسس ومفيش حاجه بعيد على ربنا ان الزمالك هيكون تانى نادى -كالعاجه يتاهل لكاس الكون للانديه اللى هتقام فى المريخ وللا بلاش المريخ ليفتكروه السودانى اللى بيعملهم حساسيه
سيبك بقى من الغم ده وتعالى نفرح شويه مش حبيبنا (جمال مبارك)نجل الرئيس هيتجوز يوم 4مايو ..أيوه ياسيدى ما كنش اتجوز لدلوقتى وحفل الزفاف هيبقى فى شرم الشيخ .....ياسلالالالالالالالالام ....هو ده التواضع وهى دى الوطنيه بيشجع السياحه وبيوفر مصاريف كانت هتبقى من ميزانية البلد .انا فرحان له قوى -بجد مش تريقه -بس ليا سؤال بسيط هى محافظة الدقهليه هتكفى اهل سيناء والقناه اللى هيهجروهم كترتيبات امنيه طبعا لتامين الفرح؟؟؟؟؟؟؟؟
عالعموم يجعله عامر وعقبال البكارى ياحبيبنا
سلطه قطعها لكم زويل

9 comments:

بتاع الجاز said...

ايه الحلاوه دى يا زويل. بس اعمل اى حاجه الا انك تجيب فى سيرةالزمالك.وبعدين الشيوعيين مالهم يازويلوف.ماتقولش كده تانى عشان الرفيق علاؤووف مابزعلش منك

zilakovich said...

بجد الأستاذ جمال بيه باشا قرب يتجوز
يادى الهنا يادى المنى
بس والنبى يا دوكتور زويل أنا عايز أطمن بس
هوا بعد الجواز ها وانتا فاهمنى
الأستاذ جمال بيه باشا هيعرف يدى الشعب حقـــه

R.R said...

ايه ده الزمالك ده من عصر الديناصورات
الفتره اللى قبل ما يكتشفوا فيها النار
يعنى انقرض خلااااااص
:)
وفرحتنى ان انكل جمال هيتجوز ويا سيدى يولع شعب شرم كله
اهم حاجه اننا نفرح بولى العهد
طويل العمر يطول عمره ويزهزه عصره وينصره على مين يعاديه

اسعدنى زيارتك لمدونتى واسعدنى اكتر معرفتى لمدونتكم
حلوه فكرة المجموعه دى

تحياتى
اه قبل ما أمشى
هقولك سر
انا زملكاويه
ها عادى بقى مسيرنا نقوم تانى

e7na said...

عاوزين زيارتك تتكرر وشكرا على الراى الجميل

أبو سويلم said...

أقسم بالله يا زويل ما تروح الفرح من غير دعوة شخصية من جمال نفسه ليبقى لى كلام تانى معاك.فاهم ولا لأ؟ويا ريت تبقى تراعى شعور الاخوة الشيوعيين اللى معانا لأنهم كانوا رجالة ووقفوا وقفة رجالة.وسلامتها ام حسن.
.

g_bouheerade said...

حقيقي يا زويل انت سلاطير ممتاز
ايه طبق السلطة الجامد ده
طبعا انت ابو الكرم وهاتعمل طبق اجمد من ده يتقدم على بوفيه الفرح انت عارف كل حبايبنا هيكونوا موجودين فلازم تدوقهم
ويكون طبق دوبل لان فرح ابيه هيكون متواكب مع عيد ميلاد بابا
عاوزة اسالك سؤال انت معتقد انهم هايكتفوا بالــ34 مادة بس
دا انا سمعت ان الدستور هايتلغي وهايمشوها نظام فرمانات
وكده تيجي منك بقى مفيش حد يعرف موضوع التنظيم السري ده غير اللي بيتفرجوا على التليفزيونات والدش بس
و المذيعة
تقوم انت تفتش السر كده
لي رجاء عندكم يا جماعة
يا ريت تحاولوا تفوقوا الناس وتفكروهم انهم بشر اتخلقوا بني ادمين
ويكون بنفس خفة الدم بس من غير الحسرة والياس يكون في شوية امل

عبده الميكانيكى said...

طب هو يوم جواز جمال هيبقى اجازة رسميه ؟؟ يعنى كل سنه هناخده اجازة كل سنه ؟؟ ولا ايه النظام ؟؟
وبالمناسبه هو لسه فيه فريق اسمه الزمالك ؟؟

g_bouheerade said...

ايه يا جماعة مالكم ما نشرتوش حاجة جديدة ليه
معقولة طبق السلطة ما اتهضمش الى الان
اتمنى اشوف مقالات جديدة
المدونة بتاعتكم بصراحة اصبحت من الاماكن الثابتة اللي لازم ادخلها كل يوم
على امل اني الاقي جديد
اتمنى اقرا لكم جديد
مع شديد احترامي لكل المشتركين فيها

mohammad nazeh said...

ياخي الزمالك حاله من حال بلدنا معدلوش قومه من النومه ... قالها الباشا زمان .. مفيش فايده.. (زملكاوي محروق دمه )