Friday, May 30, 2008

حقد تجاه أخى


لا اعرف سر هذه الحاله من الحقد تجاه أخى هذه الايام
ربما لهذه الوفره فى القنوات الفضائيه الخاصه به او لألبوم نانسى للاطفال دخل كبير فى ذلك
طبيعى جدا لجيل مثلى عانى عذابات طويله مع اصوات من عينة صفاء ابو السعود واشكال مثل محمد ثروت واغنيات مثل فى البحر سمكه لابد ان نشعر بالغيره القاتله حينما تغنى نانسى بكل ما أوتيت من جبروت لأخى شاطر شاطر او حينما تعجز هيفاء امام طفلة فى الشارع اللى ورانا وتقول لها انا عندى بغبغان
كانت عفاف راضى وبدايات أنغام من اول الاشياء التى اسمعها خاصة اغنيه انغام لالى وهى المرحله التى يصفها الكاتب باسم شرف بان انغام لم تكن قد حددت بعد هل ستصبح ذكرا ام انثى
اما عن الاعمال الدراميه فقد احتملت كثيرا من احمد عبد العزيز الى ان قام بدور جمال مبارك مؤخرا فزادت معزته فى قلبى
وفى قلبى كثيرا من الكراهيه تجاه فردوس عبد الحميد واذكر برنامج ابيض واسود يوم الاثنين برعب شديد غير طبعا ناديه الجندى آكلة الرجال كما يقول مدون زميل او نبيله عبيده او البشعه الهام شاهين بينما اخى يطاوعه قلبه ان يجد سولاف فواخرجى على الشاشه وينتقل لقناه اخرى
طبعا .........ماهو لو كان جرب ايام القناه الاولى والتانيه وحياه عبدون وهى بتعايرك وتقول لك انك لن تدير مؤشر القناه الثانيه(هاديره اروح فين؟؟) ولا تعامل مع مقدمات فاطمه الكسبانى المطوله التى تجعلك تصرف نظر عن مشاهدة التلفزيون بقية اليوم
يجلس اخى بكل غرور وعنجهيه يتنقل بين سبايس تون والجزيره للاطفال وتينز بينما انا واطفال الشارع كنا نلجأ فى أحد المنازل لننتظر كابتن ماجد حتى منتصف الليل ونحن ندعو الله الا تداهمنا اهم الانباء فتضيع السهره
اخى وكل عيال الشارع هشام وساره واحمد ومحمد وحتى شذى الرخمه
أنا باحقد عليكم

Tuesday, May 27, 2008

أخيرا يا زمالك


انا فرحان

بس مش علشانى والله قد ما هو علشان اخويا الغلبان اللى طلع لقى نفسه بيشجع الزمالك

علشان اخوه زملكاوى

وبقى له اكتر من اربع سنين بيسالنى هو احنا هناخد بطوله امتى

وعلشان سى السيد اللى قرب يجى له ضغط من تشجيع الزمالك

وعلشان الواد محمود الغلبان اللى راح الاستاد رغم انه عارف اننا هنتغلب

وعلشان الواد زلاقى اللى بعد كل ماتش يقول خلاص انا هأشجع الالومنيوم

وبتاع الجاز اللى كل ما يروح معايا الاستاد انا وهو وسى السيد

لازم نرجع مدلدلين ودانا ومكسورين الجناح

وخاصة فى رمضان

واخيرا علشان وليد كساب وشادى عيسى

وكل الزملكاويه

Thursday, May 22, 2008

زويل يكتب عن الشعب اولاد التيييييييييييييييييييييت


قامت الرقابه بعمل كبير فى هذه التدوينه...لذا يمكنكم استبدال كل ( تيت ) بالصفه ال( تيت ) التى تراها مناسبه

الى هذا الحد صرنا ( تيت ) وبي(تيت ) على قفانا ؟؟؟؟؟
الآن فقط أفهم شعور ( نجيب سرور ) وهو ينظم قصيدته المشهوره ..الآن فقط افهم شعور حافظ ابراهيم وهو يقول
فما أنت يا مصر بلد الأديب وما أنت يا مصر بالبلد الطيب
أهكذا ؟ وصل الحال الى أن نهنىء عدوناعلى قتله لنا واحتلاله أرضنا .نبعث له برقيه تهنئة بمناسبة ذكرى هزيمته لنا ووضعه حجر أساس دولته فوق كومة من جماجم فلسطينية
أسمعتم عن اخوة قتيل يهنئون قاتل أخيهم فى ذكرى نكبتهم ان هذا يشبه ال.......
وعفوا لم أستطع ان اجد تشبيها يمثل هذا الكم من الخسه والهوان الذى تردينا فيه ..أعلم ان الموضوع ليس جديدا لكنى انتظرت حتى أرى ..ربما يصدر أى ردة فعل توحى بشىء من بقية رجولة وعزة فى جسد هذا الشعب الميت
انتظرت وانا اكاد اجن مثلى فى ذلك مثل الأستاذ ( فهمى هويدى ) الذى لا يريد ان يصدق ما يحدث كما يقول فى عدد الجمعه الماضيه من الدستور والذى اتوقع ان امر اصابته بجلطه -عافاه الله منها- قريبا
انتظرت بينما كنت أصدر الكثير من الأصوات الحلقيه وال( تيت ) أى رد فعل او حتى ابداء اهتمام او اعتراض او امتعاض او أى شىء...لكن كلا ..لقد صرنا فعلا مجموعه من ( التواتيت ) -جمع تيت -تعيش فى خنوع كاى بقره فى حقل-بالرغم من اننا لا نجد ما نسد به رمقنا مثل هذه البقره-بينما ( التيت ) اللى فوق وال( التواتيت ) اللى حواليه يضربون فى الميت- اللى هو احنا- ويهينونه ويمثلون به ويصافحون قتلته من باب( لايضر الشاه سلخها بعد ذبحها )
قبل أن أنهى التدوينه اريد ان اسأل : هل تمثل لكم ( صابرا وشاتيلا ) و(قانا ) و(دير يا سين ) و( بحر البقر ) و( مذبحة الخليل ) و... هل يمثل لكم ذلك أى ذكرى ؟ هل يثير المسجد الاقصى فى نفوسكم اى عاطفه .؟ وفى المقابل هل ما زال ( موشى ديان ) و ( جولدا مائير ) و ( بن جوريون ) و ( شارون ) أعداء لكم ام سنحتفل قريبا بعيد ميلاد أحدهم وسنعزى فى موت شارون أحد رجال السلام على رأى واحد ( تيت )
أجمل ما فى الامر اننا ارفقنا ببرقية التهنئه هدية عيد ميلاد بدل ما ندخل بايدينا فاضيه هديه كبيره من الغاز المصرى تكفى لسد احتياجات الدوله الحليفه لعشر سنوات حتى نساعدهم فى استكمال بناء دولتهم الجميله الصغنونه وبينما كان بعض الجهلاء ينعون ستون عاما على النكبه وقيام ( اسرائيل ) كان الرئيس الامريكى الحليف الصديق يعد بقيام دوله فلسطينيه بعد ستين عاما اخرى شفتوا الهنا
اختم هذه التدوينه الكئيبه بقولة هيردوت حين قال "رأيت فى مصر رجالا يحيضون ويحبلون "
فسر العلماء ذلك بمرض البلهارسيا الذى كان يصيب الفراعنه بالاستسقاء الذى يشبه الحمل والبول الدموى الذى فسره هيرودوت بالحيض ..لكنى أظن الآن ان هيرودوت لم يشتبه عليه الامر وان فى مصر فعلا رجال يحملون ويحيضون وي( تيييت
)

Tuesday, May 20, 2008

عينى ع الاعلام وبلاويه


الموضوع مش جديد ...اتكلمت فيه غاده عبد العال قبل كده
وهو ان اغلب البرامج التلفزيونيه لما بتستضيف حد يتكلم عن كتاب ومناقشته المحاور نفسه بيبقى مفي عنده اى فكره عن الكاتب ولا الكتاب
فى حلقة العاشره مساء بعد فوز بهاء طاهر بجائزه النسخه العربيه من البوكر كان واضح جدا ان منى الشاذلى ولا قرأت واحة الغروب ولا حتى قرأت اى موضوع عنها فى الصحف سواء المختصه بالادب او اليوميه ورغم محاولات فريق الاعداد لتفادى المنظر الوحش لكن فى النهايه الهدف من الحلقه كانت مواكبة حدث فرض نفسه على الاخبار فاستضافوا الرجل من باب اننا مش مقصرين يعنى
نفس الشىء فى نفس البرنامج لما استضافت غاده وغاده ورحاب (اصحاب الكتب الصادره عن دار الشروق) وكمان فى حلقة البرنامج عن موقع facebook واللى كان واضح فيها جدا ان معلومات منى الشاذلى عن الموقع الاجتماعى هى نفس معلومات سعد الصغير عن موسيقى بيتهوفن
فى حلقه من حلقات برنامج مساءك سكر زياده على otv كان الضيف هو البراء اشرف للكلام عن المدونات والفايس بوك وعن فيلمه التسجيلى الاخير (المدونون ...الصحفيون الجدد) وكانت نفس المشكله ظاهره بقوه
والنهارده فى حلقة شبابيك كان الضيف هو العبقرى الدكتور احمد خالد توفيق لن اتكلم عن ان الدكتور احمد اضطر ان يحكى رواية يوتوبيا للاساتذه الافاضل وكأنه جدتهم وبيقول لهم حدوتة قبل النوم ولا هاتكلم عن استغراب التلاته ...اياد وهبه وسلمى من مصطلحات ودراسات واحصائيات وكأنهم جايين من كوكب تانى ...حتى سلمى الصباحى التى كنت احسبها اكثر اطلاعا من ذلك
لا ...انا هاقول بس ان سلمى كانت مش عارفه اسم الدكتور احمد
ونفس البرنامج استضاف اكتر من ممثل علشان يناقشوا معاهم افلام وطول الحلقه يقولوا -انا لسه مشفتش الفيلم -بس كنت عاوز اسال عن فكرة ....
هى الناس دى بالتأكيد مش فرض عليها انها تعرف كل حاجه طبعا..بس على الاقل من باب احترام الضيوف واحترام المشاهدين اللى نجاح حضرتك ونجاح برنامجك بهم انك تقرا عن الكلام اللى انت هتطلع توصله للناس
بلاش...هات لقاءات سابقه اخبار وتحقيقات صحفيه عن الموضوع
علشانكم شكلكم ميبقاش وحش كده

Sunday, May 11, 2008

؟؟؟؟؟

هى الجيوش العربيه هتيجى امتى؟؟؟
الجيوش العربيه مش فاضيه
ليه؟؟؟بتحارب فى حته تانيه
من فيلم ناجى العلى
سيناريو وحوار بشير الديك
اخراج عاطف الطيب

Wednesday, May 7, 2008

هكذا تكلمت لينا



بعض الجروح تكون أقسى من أن تترك لك مجالاً لتتألم

Tuesday, May 6, 2008

facebook



لا أذكر كيف تعرفت عليها
ولا كيف اصبحنا اصدقاء الا حينما اخبرنى الموقع انها قبلت صداقتى
كل يوم ارى نشاطها على الموقع ...كانت مرجع فى المجموعات الجنسيه..... عضوه فى جميعها دون استثناء
do you want to sleep with me
هكذا استقبلتنى الصفحه الخاصه بها على الموقع مع العديد من الصور الجنسيه ودعوات من الكثيرين للتعرف عليها
ابتعدت كثيرا عن الموقع وعدت اليوم
وكان طبيعيا ان أطمأن على كل من اخبرنى الموقع انهم اصدقائى
وعندما زرت صفحتها وجدت بجوار اسمها آية
أقترب للناس حسابهم وهم فى غفلة معرضون

Sunday, May 4, 2008

واحد منهم


اللّي ضحى لاجل وطنه...ولاجل ما يعود النهار
واللّي اسم مصر ...دايما كان لو طاقة الانتصار
اللّي ضحى لاجل وطنه...ولاجل ما يعود النهار
واللّي اسم مصر ...دايما كان لو طاقة الانتصار
اللّي حلمه حلمناواللّي فرحه فرحنا
اللّي نهر النيل..بيجري جوه دمّه ودمّنايبقّى واحد منناايوه واحد منينا!!
مصر ايه غير الاصاله.. والقلوب الطيبين مصر ايد تبني لولدنا.. حلم بكره والسنين
مصر ايه غير الاصاله.. والقلوب الطيبين مصر ايد تبني لولدنا.. حلم بكره والسنين
واللّي يرفع اسمهايبقى اغّلى عندنا..من حياتنا نفسها
يبقى واحد منناايوه واحد منينا
هو ضحى امتى يا جماعه؟؟؟
مش تنافقوا صح بقى

Thursday, May 1, 2008

لم تمت


سنفترق
هكذا اخبرها فى قسوة لم تحتملها رقتها الشديده
اختنقت بالدموع وبصوت حزين اخبرته انها ستموت بدونه
لكنه بدا متحجر القلب ولم تتحرك قسماته ولم يبد اى انفعال لكلماتها
وتركها ومضى
مرت السنوات وتقابلا
اندهش
وجدها لم تمت