Monday, April 28, 2008

اجريوم تانى

تغطية شامله لاحداث مصنع اجريوم قام بها الصحفى شريف الدواخلى على موقع اسلام اون لاين

Tuesday, April 22, 2008

مبارك جوه عينيا ووقف المصنع فرض علينا*

كلام كتير انتشر عن وقف مصنع اجريوم
انا باحاول انى انقل لكم بعض اللى حصل فى الموضوع ده
موقف الاخوان
زى العاده بعد ما انتهت لعبة المحليات سكت الاخوان واختفى كلامهم اللى رددوه فى الدعايه للانتخابات بانهم ضد المصانع الملوثه للبيئه ...حتى النائب الاخوانى الوحيد فى دمياط-محمد كسبه -اختفى بشكل غريب لدرجة انه ساب جوز الاراجوزات القرموطى-سمير موسى-ومحمود صيام النائب المستقل وطنى-لاول مره معا-والدكتور جمال الزينى اللى شتم كل مدرسين دمياط
وبقوا دول هم المدافعين ونجوم برامج التوك شو ويا استاذه منى ويا استاذ عمرو وكده
ليه كسبه او الاخوان عموما ما اعلنوش اضراب جماعى للفت الانظار ومطالبه باننا نعرف رد الحكومه على الوقفات الاحتجاجيه وطلبات الاحاطه
تفتكروا ليه؟؟


نواب الشعب
سمير موسى
النائب الطيار ....بيمد شركات ميناء دمياط بمياه الشرب واهل بلده -عزب النهضه المياه بتقطع عنده اسابيع كامله
مستنى ايه من واحد بالشكل ده
المره اللى جه فيها فى كام برنامج كان شايل معاه كبشة ورق وعامل فيها مرتضى منصور وكل ما يتكلم يقول الورق بيقول
عجبتنى قوى دينا عبد الرحمن لما ردت عليها وهو بيقول المصنع مضر بالبيئه فقالت له كان فيه كلام ان حضرتك بتشتغل فى النفايات
وطبعا غير الموضوع
اما محمود صيام فظهوره فى العاشره مساء والكلام عن المشروع بطريقة
الدمايطه طول عمرهم
والدمايطه شعب شاطر
والنهارده الدمياطى ...واحنا كدمياطه
وكاننا شعب الله المختار
والاخوه النواب لم يشاركوا فى اى وقفه احتجاجيه ضد المشروع ولا عملوا اى مؤتمرات لتوعية الناس بخطر المشروع واكتفوا بالكلام للجرائد والقنوات الفضائيه

جروبات الفايس بوك والمدونين
طبيعى ان اصحاب القضيه هم من يحركونها
ولان عدد المدونين من دمياط قليل جدا ولان الاهتمام بالمدونات خف قوى لصالح الفايس بوك فالموضوع لم ينتشر بين المدونين
اما جروبات الفايس بوك عن المشروع وعددها حوالى اربعه اكتفت احدايثها بالجديد فى الصحف عن المشروع والكلام من نوعية منها لله الحكومه
ويا حرام راس البر كانت حلوه قوى
وخلاص


مؤتمر نقابة المحامين 21\4
محاوله جيده من النقابه للتفاعل مع قضيه تهم مصر كلها لما فيها من قصص فساد وعدم اهتمام بصحة الناس ولا مصالحهم ولا حتى بمورد السياحه والصيد
لكن بصراحه المؤتمر كانت اجزاء كثيره منه حنجوريه ومثار سخريه
نقيب المحامين بدمياط احمد فايد تحدث عن حكمة الرئيس الطيار وان دمياط كلها بتحبه وعمره ما يرضى لنا الضرر ابداودى مقتطفات من كلامه

زيارة جمال مبارك بمثابة انقاذ لنا لانه لما رجع القاهره عمل اجراءاته وبعت جاب الوزراء وقعد معاهم وقال لهم شعب دمياط انا باحبه وانت مزعلينه ليه
الرجل ده بيعرف يأدب الوزراء
اما الفقره الاكثر كوميديه فكان صاحبها هو اسمه محمود فراج قالوا انه عضو اتحاد كتاب مصر
بدأ كلامه بشكر السيد الرئيس مبارك زى ما كل اللى بيتكلم فى المؤتمر ما بيعمل
وقال ان شعب دمياط ده شعب عظيم واننا ممكن نستقل عن مصر لاننا شعب منتج
وان النصر هيكون حليفنا ضد كندا زى ما انتصرنا على لويس التاسع
خد بالك من الحته اللى الجايه
وكندا دى من افقر دول العالم اللى يجيبها تستثمر عندنا
وراس البر اللى كانت مصيف ام كلثوم ومحمد التابعى واسمهان بتشتكى وبتقول لاحمد نظيف على لسان ام كلثوم:يا ظالمنى
واصحاب هذا المشروع اولاد ستين كلب...وهنا بقى الناس قعدت تصقف وواحد وقف يقول الله اكبر
وقدم الدكتور محمود سالم ابراهيم استاذ العلوم البيئيه بعلوم دمياط العديد من المعلومات عن طريقة عمل المصنع واضراره على البيئه واستهلاكه للمياه والهواء والغاز وتاثيره على نشاط الصيد وعلى المياه والتربه والزراعات والمفترض انها اهم فقره فى المؤتمر الا ان الناس كانت بتستعجل الرجل وهو بيتكلم ومحدش كان بيسمع حاجه اساسا
وبعدها اتكلم الاستاذ عباس الطرابيلى واتكلم عن اكتر من مفاجاه
منها بيع الغاز للمصنع بسعر ثابت لمدة خمس سنوات ...دولار واحد لكل وحده
وايضا بيع ارض المصنع بما يقترب من تلاتين جنيه للمتر
واتكلم عن ان المشكله فى ضرر المصنع فى اى حته فى مصر مش فى دمياط بس
ودعا الناس انها تتحرك وتخرج للقاهره وتعبر عن غضبها لان النظام اصبح لايستجيب الا للاعتصامات والاضرابات ولغة القوه
واكد ان المصنع لو كان هيقدم الاسمده للفلاحين المصريين اللى بيعانوا من ازمه فى اسعار السماد كنا نفكر فى البناء
انما المصنع هيصدر انتاجه بالكامل وكمان الموضوع مفيش فيه اى ربح
وانتهى المؤتمر بخبر اعلنه عمرو اديب فى برنامجه اعن وقف المصنع
والحضور قعدوا يهتفوا
عاش الرئيس محمد حسنى مبارك
عاش محمد البرادعى
المصرى اليوم
قدمت تغطيه مكثفه عن المشروع
وصفحات كامله يوميا
لكن هى ليه اتاخرت قوى كده
الدستور
حد يقول لزينب الزغبى دى تتتنيل على عينها وتقعد فى بيتهم
البديل
شكر للاستاذ حلمى ياسين
العاشره مساء
ابوس ايديكم اتحركوا وبلاش تستنوا تعلقوا على الاحداث
دوروا واتكلموا وناقشوا وسلطوا الضوء على احداث جديده
انتم ليه مصرين ان الحلقه بتتعمل علشان نعرف تفاصيل اكتر عن حاجات قريناها فى الجرائد
عمرو اديب
الحكومه حلوه...خليك مع الحكومه
ـــــــــــــــــــــــــــــــــــــــــــــــــــ
العنوان العبقرى ليس من ابداعى ..لقيته مكتوب على بيت على كورنيش النيل

Sunday, April 20, 2008

شىء مستحيل انك


ولماذا أكمل ما بدأت ؟؟
لماذا تتوقعون أن أكتب اليوم جزءا آخر فى السلسله التى بدأناها..لم أكن أعلم أن هذا فرض على.كما أن الطبيعه وقصص د.أحمد خالد توفيق علمتنى شيئا من التجديد وعدم استكمال ما بدات شىء رائع فى بعض الاحيان دعك من ان الرغبة فى ذلك رغبة ملحه ومتعة لاتوصف
لذا سأتحدث اليوم عن بعض المستحيلات فمثلا
شىء مستحيل أنك تتذكر اخر مره اشتريت فيها اى شىء بالعمله الفضيه ذات العشر قروش
من المستحيل انك تتذكر شىء واحد فى هذا البلد الطيب-الطيب اهله -لم يطاله الغش ابتداء من لحوم الحمير-حاء حاءحاء-وانتهاء بالفول المدمس الملىء بالبودره ومسحوق الرخام
وكأنه ناقص تقل
من المستحيل انك تتذكر اخر مره لعب فيها الزمالك امام الاهلى كوره كويسه الا اذا كنت عايش من ايام هوجة (عرابى) وتبقى بتهرج لو عاوز تفتكر امتى كسبه
من المستحيل انك تتذكر متى كان اليوم الذى لم نسمع فيه عن قتيل فلسطينى او عراقى فى نشرة الاخبار
من المستحيل انك تكون مازلت تشاهد التلفزيون المصرى بنشراته وبرامجه ومازلت حيا او عاقلا
اذا كنت كذلك ارجو منك الاتصال بنا كى نحجز لك فى محمية طبيعيه اقيمت خصيصا لحماية امثالك من الانقراض

من المستحيل ان يعدى يوم لا يتحدث فيه احد الوزراء عن غلاء الاسعار العالميه وعن نمو الاقتصاد المصرىوازدهاره وان الخاله بقت فل الفل ومن المستحيل انك تكون اشتريت فى نفس اليوم باكثر من جنيه عيش
من المستحيل انك تتذكر متى كان اليوم الذى كتب فيه ابراهيم عيسى عن شىء سوى ان الرئيس نظامه فاسد وابنه زيه ومياه الشرب الملوثه بالصرف ولو كان العدد اسبوعيا فلا باس باضافة طوابير العيش واسعار الحديد
من المستحيل ان يمر يوم بدون زياده فى اسعار الحديد
من المستحيل ان يمر يوم دون ان يقوم مفيد شهاب بعمل اكروبات جديده يجعلنا نضحك على الرجل اللى كان محترم ومصدق ان كمال الشاذلى فلته لن تتكرر فى عالم النفاق هذا
من المستحيل انك تفتكر شكل الموديل اللى كان مع (نانسى)فى كليب (أخاصمك آه) الا اذا كنت مش مظبوط ...لأن كل الناس كانت بتتفرج بس على نانسى فى افتتحاها الرائد لكليبات العرى وماحدش كان فاضى يشوف اللى معاها
ملحوظه ...جائزه خاصه لمن يتذكر شكله ...ومن المستحيل ان تنسى ابن المحظوظه اللى كان مع اليسا فى (أجمل احساس) وبالذات مناخيره اللى كانت بتلعب فى حتت جامده قوى
من المستحيل انك تفتكر شكل الست اللى كانت بتقدم -مجلة المرأه-على القناة الاولى بعد صلاة الجمعه من كام سنه كده
من المستحيل انى اكمل المقال ده دون ان اصاب بالمراره والنقطه او يسحبنى بتوع امن الدوله ويخلوا من المستحيل ان حد يعرف مكان بعدها
زويل

Tuesday, April 8, 2008

رسائل لاسراء


لمسه رقيقه من الرائعه نجلاء بدير لام اسراء

اسراء عبد الفتاح

بطلة 6 ابريل

ولمسه اكثر رقه من تيت راديو

Monday, April 7, 2008

انها مشيئة الجماعه



مر يوم 6ابريل بكل ما حمله من احداث ظهر فيها كل على حقيقته
الاخوان الفصيل والتيار الاكبر فى مصر هو الخاسر الاكبر ربما خسر الاخوان اكثرمن النظام نفسه ...فى الايام التى سبقت يوم الاضراب ومع كثرة الرسائل والنشاط التدوينى عن هذا اليوم والاقبال الكبير على جروب الاضراب على موقع فايس بوك
كان السؤال
ما موقف الاخوان من الاضراب؟؟؟؟
وفى مفاجأه كانت اقسى من عصى رجال الامن المركزى خرج بيان المرشد العام للاخوان المسلمين يحمل كلاما غامض وغير مفهوم حاول ان يرضى به كل الاطراف الا انه لم يرض احد وسبق ذلك تعليمات مكتب الارشاد لافراد الجماعه بعدم المشاركه فى الاضراب وهو ما أكده وجود طلاب الاخوان فى معظم جامعات مصر وترويجهم للمشاركه فى انتخابات المحليات والتى عادوا بعدها بيوم واحد ليدعو لمقاطعتها
عن نفسى ...ذهلت من تصريحات الدكتور محمد حبيب النائب الاول للمرشد العام بأن أى من الجهات الداعيه للتظاهر لم توجه دعوه للجماعه للمشاركه فى الاضراب(كانه فرح) والتشديد على ان الامر كان يحتاج لفترة اعداد طويله وان خطوة الاضراب هى خطوه اخيره لانها تحمل تصعيد كبير

وبعدها بساعات خرج اكثر من عضو فى مكتب الارشاد -محمود عزت وعبد المنعم ابو الفتوح -بتصريحات تتحدث عن ان الاضراب لا يعنى تعطيل حركة السير والعمل والاضرار بالمصالح وانهم ضد الفوضى وان اهداف الاضراب وتفاصيله غير معروفه لهم وهو ما يظهر التضارب فى الاراء داخل الجماعه وحالة عدم الوعى والادراك لخطورة الموقف والمكانه والدور الذى تلعبه الجماعه فى الحياه السياسيه المصريه
اما موقف شباب الجماعه فكان الاكثر غرابه فالشباب تحولوا الى اجهزة استقبال لا تعلم الا ما يصلها من تعليمات وفى كلامى مع احد شباب الاخوان بكليتى اتضح انه لا يفهم سر تعامل الاخوان بهذا الشكل ولكنه التزم بتنفيذ التكليف دون مناقشه او استفسار
نجح الاضراب وخسرت الجماعه كثيرا واصبحت فى موقف لاتحسد عليه
ــــــــــــــــــــــــــــــــــــــــــــــــــــ
سؤال غير برىء
هل يتضامن الاخوان مع عمال غزل المحله والمصابين والمعتقلين فى احداث امس
وهل ستنظم الجماعه مسيرات ووقفات احتجاجيه للاعتراض على الممارسات الامنيه مع المتظاهرين كما فعلت مع اخواننا فى غزه وقت الحصار
؟؟؟؟؟

Sunday, April 6, 2008

شاب لذيذ

فى وسط كل التوتر
والناس على صفحة الاضراب على الفايس بوك
ومستنين اى اخبار حقيقيه او صور وفيديوهات
بسبب حالة التعتيم الفظيعه
دخل شاب
مثال للشباب الحلو اللى بنشوفه فى الشوارع وسأل سؤال عبقرى وفى محله
Tarek Adel (Egypt) wroteat 11:11am
ya gama3a 7ad yetameny ahmed hassan mada lel ahly walla lessa
عاوز حد يطمنه
احمد حسن وقع للاهلى ولا لا
لو حد عنده اخبار يا ريت يطمن
تييييييييييييييييييت امه