Thursday, March 29, 2007

التخديلات الدستوريه..طبق اليوم.....مفروس افندى

التخديلات الدستوريه
انتاج المطبخ السياسى المصرى
التاريخ 16/3/2007
الطهاه العائله الحاكمه وحاشيتها
المقادير
كثير من البهاله
مقدار معقول من الأونطه
ملعقتين استبداد
كوب توريث
فنجان كبير كبت حريات
طريقة التحضير
مطلوب ناس نايمه وسلبيه .دول اللى هيأكلوا الطبخه
مجموعه من رجال القانون يقف ابليس متواضعا أمام عبقريتهم
جهاز أمنى فهمه على قده ...ينفذ وبس
اخلط هذا المقدار ببطء يطلعلك ناس مفرومه بنكهة التعديلات الدستوريه
النتيجه
هذه التخديله لها قدره عجيبه على تغيير الاشياء تقدر تنقلك فى لحظه من بيتك الى منتزه طره وكان الله بالسر عليم
كما أن لها تأثير كبير على المراه بقدونس الحياه تحشرها فى كل حاجه لما ممكن يطلع لها شنب فى الاخر من كتر المساواه
الآثار الجانبيه
يصاحب هذه التخديلات بعض الهلاوس ..يعنى ممكن تاكلها النهارده وانت بيحكمك واحد اسمه محمد تصحى الصبح تلاقيك بيحكمك واحد اسمه جمال
فى كل أكله يقول الطهاه بالهنا والشفا لكن للأسف فى أكلتنا دى الطهاه قالوا بال......الهارى

بيبى هيفا.....................بقلم زويل

طبعا اذا كنت سيادتك من متابعى أخبار هيفاء وهبى زى اى شاب عنده غرائز هتعرف معنى العنوان ده .اما اذا كنت سيادتك مش من متابعيها -مش معنى كده انك ملكش غرائز-بالتأكيد بتابع اليسا أو نانسى ...ربنا يخلى لبنان
العنوان ده مش معناه ابن هيفا .الموضوع ان هيفا قررت تقتحم عالم الاطفال بألبوم غنائى -على حد كلامها-ده عنوانه.علشان تربى الجيل ده صح على ايديها وحتى تضع لهم القدوه والمثل فالبنات يعرفوا يرقصوا والولاد يجيلهم بلوغ مبكر
وأنا احب ابشرالعيال ان زمن المذيعه العجوزه ومايطلبه الاطفال والعبط ده انتهى خلاص وسلم لى على ارقص لى يافيل يا ابو زلومه ...فيل ايه اللى يرقص وعندنا هيفا ودومينيك ومروى اللى قرروا يقتحموا المجال ده برضه..كمان ايه القرش ده؟ -واضح ان الاغنيه دى كانت قبل الثوره-وزمن صفاء ابو السعود وياصحابى وصحاباتى خلص تماما ولافرشه سنان ولاصابونه بتزفلط ..الصابونه فى الموضه الجديده ليها استخدامات تانيه خالص...وقبل ماتفكر غلط المطربه هى اللى هتستخدمها علشان تعرف الطفل ازاى يستحمى ..آسف ياخد شاور
الاغنيه اللى عجبت هيفا جدا وقررت اعادة غنائها هى أغنيه انا ابريق الشاى ولكن مع بعض التعديل فاصبحت كلماتها
أنا أبريق الشاى ...بوزى كده .مع حركه راقصه وابراز جزء من الجسد يشبه البوز اسما ومعنى ....كده وحركه اخرى وكلمه لا استطيع ذكرها فنحن لسنا فى مقال ثقافى...وأعرف برضه ياوظاويظ ارقص استربتيز
ونحن من مدونتنا هذه نوجه تحيه عميقه معطره بالحب لهيفا واخواتها على مجهودهم الكبير فى تنميه عقل الطفل العربى وفى انتظار البومها الذى سيجمع الكبار والصغار امام برامج الاطفال

Friday, March 23, 2007

هى دى مصر ياهبله

الأحوال المالية
ديون : إجمالي 614 مليار جنيه- الفقر :44% من الشعب تحت خط الفقر,أقل من1 دولار في اليوم-نقود مهربة : 300 مليار دولار خرجت من البلادالجنيه المصري : الدولار= 85 قرش سنة1981م و 6 جنيهات وربع سنة 2005 م
الأحوال الصحية:
السرطان : تضاعف 8 مرات ..أعلى نسبة في العالم الذبحة الصدرية :20 % من الحالات شباب تحت الأربعين- البلهارسيا : أعلى نسبة في العالم- السكر : 7 ملايين .. 10 % تقريبا من عدد السكان -إلتهاب كبدي : 13 مليون.. 20 % من الشعب -فشل كلوي : أعلى نسبة في العالم -شلل الأطفال : موجود في 6 دول في العالم فقط منهم مصر الإكتئاب : 20 مليون مواطنأمراض نفسية ( أخرى) : 6 ملايين- التدخين : 80% من البالغين مدخنين- التلوث : أعلى نسبة في العالم...تلوث للهواء ومياه الشرب والتدهور في التربة والمناطق الساحلية..خسائر 30 مليار جنيه الانفاق الحكومي: 10 دولار للفرد سنوياًالأحوال الاجتماعيةالقضايا : 20 مليون قضية بالمحاكم ..أقدمها من 38 عام حتى الاّن
البطالة
29% من القادرين على العمل..حوالي 5 مليون شابالانتحار : 3 اّلاف محاولة سنوياً حوادث الطرق : 6 آلاف قتيل سنويا و 23 الف مصاب الطلاق : 28%العنوسة : 7 مليون عانس .. 4 مليون فوق 35 عامالهجرة : 4 ملايين مهاجر : 820 ألفاً من الكفاءات و 2500 عالم في تخصصات شديدة الأهمية.. 6 ملايين طلب هجرة للولايات المتحدة وحدها سنة 2005 الأُمية ( الحالية) : 26% من الشعب المصري
الأُميةالمستقبلية
7% من الأطفال لا يدخلون المدارس بسبب الفقر ..غير الهاربين بعد الدخولالتعليم : دروس خصوصية ، كتب خارجية ، جامعات خاصة للربح فقط عمالة الأطفال : نصف مليون طفل أطفال الشوارع : تقربر الأمم المتحدة : 100 ألف طفل عشوائيات : 45% من الشعب يسكن العشوائيات .. 35 منطقةعشوائية بالقاهرة فقط موظف الحكومة : تحت خط الفقر ويؤخذ منه ضرائب( ستة جنيهات متوسط دخل الموظف يومياً المخدرات : 6 مليار دولار سنوياً في تجارة المخدرات ..مشاكل أخلاقية ....رشوة،.... محسوبية ،.... بلطجة ، ....توريث المهن ، ....عُري ، ....زواج عرفي.... ,قتل الأزواج ،.... امتهان وتحرش بالنساء ،.... ألفاظ بذيئة ،.... صحافة .....غش جماعي.... وجريمة ....و تسول....
.الأحوال السياسية
سيطرة وفساد النخبة الحاكمة ، ....مراكز قوى ، ....، تزوير انتخابات....،قمع المعارضة.....،اعتقالات ....، تعذيب حتى الموت....، انتهاك لحقوق الإنسان ، .... إلغاء دور النقابات.... والجمعيات الأهلية .... مشاريع قومية متوقفة .... او خاسرة ....القضاء على الأمية قبل عام 2000 ، زراعة الصحراء الغربية بالقمح (مشروع اليابان) وادي السليكون .محطة الطاقة النووية، جامعة د/ أحمد زويل (التكنولوجيا) فوسفات أبو طرطور , وادي توشكى أكثر من 2,3 مليار جنيه خسائر بشركات القطن ....و 8 مليارات جنيه خسائر شركات الغزل والنسيج ... و 12 مليار جنيه العجز الإجمالي لسكك حديد مصر... خسائر 10 مليارات جنيه بقطاع الإذاعة والتلفزيونالأزماتفساد.... , تعليم.... ، إسكان.... ، زواج...، بطالة ، ....صحة ،.... أخلاق ،.... ضمير ... ، مرور .... , مياه نظيفة،.... صرف صحي...، البناء على الأرض الزراعية،.... تصحر، ....زحام ....,غلاء,... انخفاض احتياطي النقد...
.الأرض الزراعية تم تجريف مليون و200 ألف فدان أرض خضراء من 5000 سنة من أصل 6 مليون فدان قانون الطوارىء
25 سنة طواريء
الاحصائيه السابقه من موقع حركة كفايه على الانترنت ..

Wednesday, March 21, 2007

مصر المهروسه ..........توهان ابولسعه

اليوم 21مارس
الموضوع حالة توهان
أنا ياصحابى كنت ماشى يوم عيد الام ادندن ..فجأه رحت فى التوهان .........شفت خيراللهم اجعله خير انى ماشى فى طريق طويل........ ولقيت ست قاعده فى جنب الطريق قلت اقرب منها
كل سنه وانت طيبه يا امى
انا مش طيبه انا حزينه قوى ياابنى
ليه ياامى ايه نبره الحزن الكبير اللى فى صوتك؟
ولادى نسوا كل اللى ربيتهم عليه
يعنى ممكن يكونوا عمل ايه يستاهل كل الحزن ده؟؟
عملوا كل اللى مايتعمل
عندك مثلا ابن من ولادى خد الفلوس شقى اخواته الغلبانين وفك وخلع
ياساتر يارب
وابن تانى عشان الفلوس برضه ركب اخواته الاغبه فى مركب ملهاش مكان غير الخرابه وموت اخواته محروقين فى وسط البحر
أعوذ بالله
متستغربش قوى كده ابن تانى هوايه عنده يلبس القطارات فى بعض
ايه ياحاجه ؟؟؟...هو انت ولادك كلهم كده
لا والله يا ابنى أنا ولادى زى الفل بس هم الكبار اللى سايقين العوج
قولى ياحاجه فضفضى
عندى ولد تانى ولع 200انبوبة بوتوجاز شفت كده؟؟؟؟؟؟؟؟
وهنا يسمع صوت بتاع الانابيب
فتشير اليه الام بحسره اهو ده بتاع الانابيب
ايه اللى انت عامله ده يافوزى ؟
شوف ياباشا انا عملت اللى هم قالوالى عليه
ازاى يعنى؟
هم قالوا والنبى يافوزى وحياتك يافوزى تدينى بمبه
تقوم تديهم 200بمبه روح ياشيخ...واوعى تيجى بسرعه
التفت اليها
انا اسف ياامى بس انا حاسس انى اعرفك
كل ده ومعرفتنيش ياتوهان؟
فتأملت ملامحها ...امرأه تحمل الكثير من الخير..بيدها دستور ممزق وبجوارها من يقوم بترقيعه
صرخت ...عرفتك انت امى ...مصر المحروسه
فردت فى ياحزن ...
لاياتوهان ......مبقتش المحروسه أنا مصر المهروسه
توهان ابولسعه

Saturday, March 17, 2007

انفراد...........توهان ابو لسعه

نعلم ان نشر الحوار جاء متأخرًا ولكنه لأسباب خارجة عن ارادتنا
واليكم نص الحوار دون حذف

تقمصت أنا توهان ابو لسعه دور المذيع ونزلت يوم 14فبراير الى الشارع لاعرف انطباعات الناس عن هذا اليوم المبارك
أول ما لفت انتباهى فى هذا اليوم هو ان كل شىء اكتسى باللون الاحمر ..قلوب ودببه وورود حمراء ...هى الناس جالها حصبه ..والله عجيبه واحترت من اين ابدا حوارى هل مع الشباب حاملى الهدايا والذين تظهر عليهم آثار النعمه ام مع البسطاء الذين نحت الفقر ملامحهم وطبعا بما اننى من عليه القوم وطول عمرى فى التوهان انحزت بالطبع الى هذه الطبقه التى تسكن على الهامش وهنا بدأ الحوار
اسمك ايه يا استاذ؟
ضحك ثم قال ربنا يجبر بخاطرك فكرتنى انى استاذ انا على خريج آداب قسم فلسفه
وطبعا ما بشتغلش فى تخصصى ولكن باشتغل كذا شغلانه علشان اعيش العيال وامهم ومش مهم انا اعيش
استاذ على انا مش من الشئون الاجتماعيه..انا كل اللى عايز اعرفه انطباعك ايه عن العيد ده؟
عيد ايه؟؟؟؟؟ بناكل لحمه
قاطعته استاذ على باكلمك عن عيد الحب
يعنى ايه؟
يعنى قلوب حمرا ودباديب وورود حمرا والحاجت الحمرا دى
شوف يا استاذ انا الحاجه الوحيده الحمرا عندى
قاطعته فيه ايه يا استاذ على؟ مش عاوزين تجاوز
فرد باسما متزعلش انت فهمتنى غلط انا اقصد عينيا هى اللى حمرا من كتر السهر فى الشغل علشان اواجه الحياه اللى بقت نار حمرا

Thursday, March 15, 2007

انترفيو.................تخاريف دكتور

interview
انترفيو يعنى مقابلة عمل
لو أنت شاب او شابه مخلص كليه وعايز تشتغل -طبعا مش وظيفه حكوميه-لأنها مش محتاجه انترفيو محتاجه حاجه تانيه
انتم عارفين هى ايه طبعا
المهم انت فضلت تشترى فى جرنال الاهرام بتاع الجمعه اللى انا مش شايف له اى لازمه غير شوية الاعلانات اللى مالياه
المهم نرجع لموضوعنا ..فضلت اشترى الجرنال بتاع شهرين يعنى 8أعداد وكل عدد الاقى بتاع 5-6اعلانات وبعت فاكسات واتصلت وبعت ايميلات كل ده علشان أروح انترفيو
المهم جالى الرد واتحدد لى ميعاد الانترفيو
لازم اجهز طبعا للموضوع المهم ده احنا بنتكلم فى نقطة تحويل مسار كامل
من طالب................فتره كبيره قوى مش عارف قد ايه الى راجل عامل مكد له دور فى المجتمع
يبقى لازم اعمل ايه وانا رايح الانترفيو؟
1-احلق ذقنك جيداً
2-اكوى البدله الجامده برضه جيداً
3-لمع الجزمه جيداً
4-أحلى برفان ورشه جيداً
5-أحلى كريم جيل 2 فى 1 فيانسيه ولو فيه 3 فى واحد يبقى أحسن برضه
وبرضه شعرك تسرحه جيدا
طبعاً ده لو شعرك قوى وقدر يستحمل الضغط العصبى بتاع الحياه ولسه موقعش -الله يرحم الشباب
بعد ماتظبط نفسك ورايح طبعاً الميعاد بدرى وعايز تشتغل يبقى لازم-بينى وبينكم-تكون
منافق
كذاب
هو ده اللى الشغل عاوزه
ولما يسألك عن صفاتك تقول
أمين........و........صادق وانت أصلا بتكدب
وتقول ان اصحابك بيقولوا عليك كده
ده ان كان ليك اصحاب اصلا قادرين يستحملوك وتستحملهم مع كل المشاكل اللى احنا عايشين فيها
المهم لو انت محظوظ بقى يبقى هتشتغل بعد 20-30انترفيو بعد مايطلع عين أهلك على الفاضى ولما تشتغل هتفتكر الايام دى وتضحك عليها
ولو انت طموح شويتين يبقى مش هتبطل ادمانك للمدعو انترفيو ليه بقى ؟؟؟
مع انك اشتغلت بس لأ!!! انا عايز مكان أحسن من اللى انا فيه
يعنى وضع جتماعى احسن
شركه احسن
فلوس اكتر وكده ..............طمع بعيد عن القارئين
دلوقتى هتبقى واثق فى نفسك اكتر وانت فى المقابله لان مش فى دماغك الشغل يجى ميجيش مش مشكله ما انت شغال اصلاً الله يسهلك ياعم
لينا انترفيو تانى لو كان فى العمر بقيه

هل تعود الذكريات؟؟؟؟؟؟؟؟؟؟؟؟؟؟بقلم زهرة البنفسج

تتوالى الأيام ويأخذنا الحنين لذكرياتنا لنعيشها مرة أخرى ........... ولكن هذه المره تختلف فيها أحاسيسنا .............. ربما بدموعٍ في عيوننا .......أو ابتسامة على شفاه عجزت عن وصف هذه الأيام.........إنها ليست أيام فقط بل أيام وأحداث وأشخاص وأشياء شكلت وجداننا
فكيف ننساها ؟؟؟؟؟؟؟؟؟
زهرة البنفسج

Wednesday, March 14, 2007

أين بلال فضل

دون أسباب واضحه غابت عن صفحات الدستور منذ فتره مقالات الساخر بلال فضل
ننتظر معرفة السبب

يابخت الح.................من يوميات مفروس أفندى

ظهرت فى الفتره الاخيره مجموعه من الاغانى تحت شعار الرفق بالحيوان من سعد الصغير وشعبولا
وأخبركم أنه من مصدر موثوق ثبت أن الحمار يبادلهم نفس المحبه
ويؤكد لكم أن ميلاد هذه الاغانى جاء بالتأكيد أمام المرآه
مفروس أفندى

قمرى.....بقلم قطر الندى

صديقى العزيز
اشتقت اليك ..والحديث معك ...طالما جلست لأراك ولكنك كنت غائب ...كيف تستطيع البعد عنى كل هكذا ؟؟
قمرى
أراك اليوم أجمل من أى يوم ...أشعر أنك تظهر من أجلى أنا فقط ...أرى السماء من حولك أنقى من أى يوم والنجوم ساطعه حولك كقطع من الماس حولك
قمرى
أنت صديقى ...مخرج آلامى......شريك أحزانى وأفراحى...كن واسع الصدر ...استمع لما حدث لى فى غيابك
كان اجمل يوم فى حياتى ...كانت الدنيا حولى جنان وخضره ...العالم ربيع وزهور..وأحلام ورديه...حين اقترب منى حبيبى وهو يبتسم بابتسامته الصافيه ونظرته البريئه ...وبدأ يتكلم معى ...وكل كلمه ترفع قدر حبى له ...وتزيدنى تمسكاً به ...وتضيف الى شعور جديد..يزيد الحب ...ويرفع الأمل ...ويقربنى الى قلبه الكبير..
أكون أمامه ضعيفه أكون عاجزه عن اعطائه مشاعر تفوق مشاعرى.....قلبى أعلن انه لايستطيع مقاومته
قمرى
كنت دوماً أراك أجمل مافى حياتى...ولكننى عذراص أتراجع اليوم
انه اجمل من أى شىء ..ولكن لاتحزن فهو يشبهك كثيراص فى اطلالتك المشرقه ..وحنانك...وسعة صدرك
عندما أكون الى جواره أشعر اننى أملك الدنيا ...أصل الى النجوم وأمسك بها لأهديها له ..ولكنها لاتليق بقدره
كنت أظن أن الورود البيضاء هى أقصى تعبير عن الصفاء ..ولكنى
وجدته أصفى منها ..أرق منها ..يحمل فى قلبه احساس يفوق عشرات المرات ماتعبر عنه الزهور البيضاء التى طالما عشقتها
أيها القمر المضىء
لاتظن اننى أبالغ فى وصفه ...صدقنى كل هذه الكلمات عاجزه عن وصفه
قطر الندى

لا دموع بعد اليوم


فى احدى المدونات وجدت هذه الصوره الحزينه

ولصاحب الصوره اقول
لسه بدرى على الحزن
المسافر

Tuesday, March 13, 2007


طلب منى الكثير من أصدقائى أن أصف حبيبتى ..وفى الغالب أعتذر..لعلك تدركين مدى صعوبة الأمر كيف أصفك؟؟؟؟؟

اوراق عاشق..............بقلم المسافر

لا أعرف لماذا يتعجب أصحابى من حبى لهذا الجو الشتوى؟!انه شعور أراه رائعاً ان تقف خلف نافذتك لترى قطرات المطر تنزل على الأرض باعثةً فيها الحياه ومنظر الحقول الخضراء والأطفال وهم يرفعون أيديهم لتمسك بقطرات المطر فى براءةٍ ليس لها مثيل كم هو جميل ان أجلس وسط كل هذا أتخيلك الى جوارى ويمر شتاءٌ تلو الآخر ولاتاتين أحب الشتاء كما أحبك
المسافر

ولعه ..........تخاريف دكتور

ولعه
كبريت لو سمحت
من العنوان يعنى اللى بيقول انى محتاج حاجة والحاجة دى هى الكبريت............... ياسبحان الله نبيه!
اه مش دكتور لازم اكون نبيه
المهم بقى يارجالة ولا بلاش رجالة عشان محدش يقول عدو المراة ولا حاجة.......... نقول ياجماعة؟؟
المهم يا جماعة موش أنا اللى عايز الولعة دى أو موش أنا اللى عايز الكبريت
الموضوع كله هى النكتة اللى جاية دى
نكتة: " شوية مساطيل قاعدين فى خيمة والكبريت اللي معاهم خلص واحد ابن حلال قال أنا هاقوم أجيب كبريت خرج من باب الخيمة ودخل من الباب التانى وسألهم معاكم كبريت قالوا له اقعد استنى إحنا باعتين واحد يجيب ولما يجى هنعطيك"
عارفين بقي ياجماعة انا لما سمعت النكتة دى فكرتنى بحاجة حلوة قوى قوى
فكرتني بحالنا........ اه والله حالنا احنا
حالنا واحنا مستنين اللى يجيب الكبريت وهو اصلا قاعد معانا مستنى
طبعا احنا مش مستنين كبريت احنا مستنين الفرج قول مستنين الموت قول المهم مستنين
وأنا على فكرة مسطول برضه معاكم قصدي مستنى معاكم
"غطيني ياعم الحاج"
وياريت حد فينا عارف هو مستني ايه كنا بقينا أحسن شوية
سؤال الحلقة : السؤال مقتبس من الأغنية
مستنى ايه ؟؟؟؟؟؟؟؟؟؟؟؟؟؟؟
تخاريف دكتور

هل نحن فراعنه.............بقلم حورس بتاع الجاز

فاز الفراعنه
جمله نسمعها عندما يحرز فريقنا الوطنى أحد البطولات -مع ندرة هذا الحدث-فنفرح بهذه الكلمه ونرددها
فاز الفرعون المصرى أحمد زويل بجائزه نوبل
وكأنه أحمد زويل حتحور..........هل نحن فعلا فراعنه؟؟؟؟؟؟؟
بمعنى آخر هل بقى أحد من سلالة الفراعنه الى الآن؟؟؟
اننا ولاشك خليط من جميع الأجناس والشعوب التى وفدت الى مصر اما غازيه أوفاتحه من هكسوس ورومان وفرنسيين وعر ب وانجليز وأتراك وتتار
.بحيث أننا لا نستبعد أن يكون هؤلاء الأبطال فيهم من هو حفيد هولاكو أو جنكيز خان
اذن نحن ابناء المستعمرين والغزاه الأوغاد الذين لايستحقون العيش ليوم الثلاثاء ولا الربعاء حتى
ولكن لحظه
من أين تواجد بين مجتمعنا أسماء مثل رمسيس ...وهو المذيع الأخف دمًا فى العالم وأسماء مثل لميس وايزيس
فهذه موروثات عنهم وهناك بعض العادات ترجع اليهم مثل شم النسيم ومثلا كلمات مثل
كخ ...قذر
تاتا ....خطى العتبه
يامطره رخى رخى ....رخى تعنى انزلى
بيصاره .........أصلها بيصار ومعناها الفول مطبوخ

تخيلوا البصاره من أيام الفراعنه أى أننا فقر من يومنا
ماعلينا المهم من نحن
المؤكد أننا ليس معظمنا فراعنه بل قلة قليله جدا
حورس بتاع الجاز

كتائب الشهيد جيفارا........ابوسويلم



ربما لا يعرفه البعض جيداً.. ولكن الكثيرين لا يعرفون من هو ..اللهم الا اسمه فى أحسن الأحوال .فلو سألت عن صاحب تلك الصورة الشهيره التى كثيرا ماعدنا نراها فى المحال التجاريه وفى الأماكن العامه وعلى قمصان الشباب والفتيات
صورة ذلك الرجل ذو اللحية السوداء والشعر الأسود الكثيف الذى يغطى معظمه قبعة عسكريه تتوسط مقدمتها نجمه خماسيه ويضع فى فمه سيجارا كوبيا فاخرا
لو سالأت عنه سيجيبك أحدهم فى ثقه اعتقد أنه أحد المجاهدين الافغان وربما يجيبك آخر كيفلا أعرفه انه الرفيق تشى ولد بالارجنتين وقرر الثوره على القوى الديكتاتوريه الحاكمه فى امريكا الجنوبيه فشارك مع فيدل كاسترو فى الثوره الكوبيه وتولى احدى الوزارات لعدة سنوات ثم قتل فى بوليفيا على يد المخابرات الامريكيه حينما ذهب لمساعدة الثوار هناك
انه الزعيم الروحى لكل الثوريين فى العالم
وتعليقا على الاجابتين فان ذلك الجاهل المتنطع الذى لم يكلف نفسه عناء السؤال والمعرفه لايستحق عناء العتاب أو تصحيح الخطأ وما أكثر امثاله بيننا. وأما الآخر المبهور للغايه بذلك الثورى جيفارا فهو مناط حديثنا حيث اننا لاننكر على جيفارا أنه لايستحق الاحترام لكونه رجلا قاتل وعاشحياته من أجل مبدأ معين آمن به -أيا كان هذا المبدأ-وقتل فى سبيل مبدأه هذا .ولكن ماننكره هو طغيان هذا النموذج البطولى الغربى على عقلية الشباب العربى والمسلم على الرغم من ان تاريخنا العربى والاسلامى حافل بأبطال أجل وأعظم من جيفارا وغيره .ولنأذكر أمثلة من الصحابة أو السلف ولكننى سأذكر أحد أبطال الاسلام المحدثين لتكون المقارنه أسهل وأقرب الى الواقع المعاصر
ألايستحق عمر المختار الذى جالد الفاشية الايطاليه فى أوج قوتها وهو رجل فى السبعين من عمره لا يملك من العتاد العسكرى شيئا الا ما استطاع أن يغنمه من الجيش الايطالى ونفر قليل من الرجال المؤمنين بنصر ربهم
ألا يستحق ذلك الشيخ المجاهد أن يعامل على الأقل معاملة العرب والمسلمين لجيفارا الذى أطلق اسمه على احدى المجموعات الفلسطينيه المسلحه والمعروفه باسم كتائب الشهيد جيفارا أم أن لحية تشى السوداء أفضل من لحية عمر المختار البيضاء أو ربما لأن عمر المختار لم يكن يدخن السيجار الكوبى الفاخر الذى اقترن بجيفارا دائما
ربما ربما ربما
بقلم ابو سويلم

Saturday, March 10, 2007

احنا مين


...ايوه يا عم ولاد النهار ده...

يعني مواليد خمسه الصبح

وقبل ما تقولي جاي تشتري كافوله ولامحلول الجفاف احب اهنيك ..ده مش قصدنا يا حلو

احنا بس كل اللى مضايقنا ومعصبنا اننا على طول بنسمع "أيام زمان كانت أحسن "..الخير زمان كان أكترأفكار زمان كانت أحلى

...زمان...زمان...زماااااااااااااااااااااااااااااااااان

لأااااااااااااااااااااااااااااااااااااااااااااااااااااااااااااااااااااااااااااااااااااااااااااه

احنا ولاد النهارده يبقى لازم نعيش النهارده بحلوه وان كان مر نحليه

احنا بقى اللى هنوريك اللى عمرك ماشفته

"لأ يا خفه مش روتانا "

أفكارنا طازه جدا... لسه أم محمد الدايه مفرحانا بيها من ساعتين

باختصارأفكارنا كلها ..............قنابل

ولاد النهارده

Friday, March 9, 2007

قصيدة أحبك.............زويل

1
أحبك
أحبك فوق خيال البشر
وان كلامى لوصفٌ هزيلٌ
عتيقٌ
لحب عميق
وبحٌرأنا فيه قبطانه
وحيناً غريق
أحبك
2
أحبك
ووصفُ المحبة صعب
وثرثرةٌ فى الهواء
كأنى أحاول نقل البحار
وعد الرمال
ولمس السماء
أحبك
3
أحبك
فهل تقبلينى؟
فحقاً أنا لست حلم النساء
ولكن لأجلى دعينى أحاول
أسوى الجبال تراباً
أخيط المجرات عقداً لك
-ان تامرينى-
وان ترفضينى فانى لراضٍ
بأن تدعينى
وحسبى أقول
أحبك
4
أحبك
وتصدقى..
انا لست أذكر وجهك
فروحك طاغيةٌ فى المكان
وتطغى على أى شىء سواها
وتضفى على الكون جو الأمان
ويقف الزمان
وتمسح ذاكرتى فلا أتذكر
الا أنى -بحق-
أحبك
5
أحبك
وقلبى أسيرٌ لديك
ومايبتغى فك قيد الهوى
فزيدى عذاباً
فقلبى لكل مصاب سواك اشتوى
لأنى
أحبك

كان نفسى أطلع تافه...... من يوميات مفروس افندى

نعم ..هى احدى لحظات يأسى ..دبت فى عقلى هذه الأفكار
ليه ماكنتش ميمى؟ أو توتو؟ أو طلعت مطرب شعبى حقير يغنى للمخدرات فتصفق له الجماهير؟ اوطلعت لاعب كره لا احقق شيئا ومع ذلك لى كل التقدير المادى والمعنوى؟
ليه طلعت مدرس محترم ومكنتش سباك محترم ؟ مش كنت سلكت أمورحياتى
مفروس افندى
مفلس بالتربنه والتعتيم
أقصد مدرس بالتربيه والتعليم

شنطة سفر ...قصه قصيره بقلم المسافر

رغم تطابق اسم البوست مع أغنية أنغام الشهيره الا أننى لن أدع لك الفرصه أن تسألنى
لسه ناوى ع الرحيل؟؟
لأننى لن أتردد لحظه وأنا أقول لك أن كل مايهمنى فى هذه اللحظات ويشغل بالى ماذا أحمل معى فى شنطتى
أيام طويله قضيتها وأنا أنهى اجراءات سفرى وتعبت من البيروقراطيه والتعقيد مما زادنى رغبه فى الرحيل فعن قريب سارتاح من هذا الملل
هيا ساعدنى فى تذكر ما أضعه فى شنطة سفرى...فى البدايه سأحمل معى حلم أن أصبح استاذا جامعيا .نعم لاتتعجب من اننى تجرأت وحلمت هذا الحلم وأنا مصرى ونسيت فى خضم أحلامى أننى لست ابن سفير أو وزير أو غفير.وأفقت على واقع مرير وهو أننى عاطل ..سأضع هذا الحلم فى الجيب الأمامى حتى أتذكره دوما حينما أشتاق الى هذا البلد
ماذا أضع بعد ذلك
ذكرياتى مع أصدقاء جمعتنى بهم اهتماماتنا المشتركه وأحلامنا الوديه جلسنا معا نتبادل الأحلام ومشينا فى طرقات بلدنا
وسأضع أيضا بقايا حب ضائع قضى عليه واقعى المخزى.ولكننى أنا المخطىء .نعم انسان بلا عمل ولامال ولاشىء
ليه يبهدل بنات الناس معاه؟؟
صورة أخواتى وأبى وأمى واليهم أقول
أعذرونى أننى سأترككم ولكن مافائدة أن أظل الى جواركم هكذا ؟؟؟؟
وانتهيت من ترتيب شنطتى
الى اللقاء
بقلم/ المسافر