Thursday, March 15, 2007

انترفيو.................تخاريف دكتور

interview
انترفيو يعنى مقابلة عمل
لو أنت شاب او شابه مخلص كليه وعايز تشتغل -طبعا مش وظيفه حكوميه-لأنها مش محتاجه انترفيو محتاجه حاجه تانيه
انتم عارفين هى ايه طبعا
المهم انت فضلت تشترى فى جرنال الاهرام بتاع الجمعه اللى انا مش شايف له اى لازمه غير شوية الاعلانات اللى مالياه
المهم نرجع لموضوعنا ..فضلت اشترى الجرنال بتاع شهرين يعنى 8أعداد وكل عدد الاقى بتاع 5-6اعلانات وبعت فاكسات واتصلت وبعت ايميلات كل ده علشان أروح انترفيو
المهم جالى الرد واتحدد لى ميعاد الانترفيو
لازم اجهز طبعا للموضوع المهم ده احنا بنتكلم فى نقطة تحويل مسار كامل
من طالب................فتره كبيره قوى مش عارف قد ايه الى راجل عامل مكد له دور فى المجتمع
يبقى لازم اعمل ايه وانا رايح الانترفيو؟
1-احلق ذقنك جيداً
2-اكوى البدله الجامده برضه جيداً
3-لمع الجزمه جيداً
4-أحلى برفان ورشه جيداً
5-أحلى كريم جيل 2 فى 1 فيانسيه ولو فيه 3 فى واحد يبقى أحسن برضه
وبرضه شعرك تسرحه جيدا
طبعاً ده لو شعرك قوى وقدر يستحمل الضغط العصبى بتاع الحياه ولسه موقعش -الله يرحم الشباب
بعد ماتظبط نفسك ورايح طبعاً الميعاد بدرى وعايز تشتغل يبقى لازم-بينى وبينكم-تكون
منافق
كذاب
هو ده اللى الشغل عاوزه
ولما يسألك عن صفاتك تقول
أمين........و........صادق وانت أصلا بتكدب
وتقول ان اصحابك بيقولوا عليك كده
ده ان كان ليك اصحاب اصلا قادرين يستحملوك وتستحملهم مع كل المشاكل اللى احنا عايشين فيها
المهم لو انت محظوظ بقى يبقى هتشتغل بعد 20-30انترفيو بعد مايطلع عين أهلك على الفاضى ولما تشتغل هتفتكر الايام دى وتضحك عليها
ولو انت طموح شويتين يبقى مش هتبطل ادمانك للمدعو انترفيو ليه بقى ؟؟؟
مع انك اشتغلت بس لأ!!! انا عايز مكان أحسن من اللى انا فيه
يعنى وضع جتماعى احسن
شركه احسن
فلوس اكتر وكده ..............طمع بعيد عن القارئين
دلوقتى هتبقى واثق فى نفسك اكتر وانت فى المقابله لان مش فى دماغك الشغل يجى ميجيش مش مشكله ما انت شغال اصلاً الله يسهلك ياعم
لينا انترفيو تانى لو كان فى العمر بقيه

1 comment:

g_bouheerade said...

المفروض يا دكتور النصائح الغالية دي لا تنشر هكذا مجانا
او حتى كنت سجلتها باسمك
وطبعا كنت هاتلاقي كل العاطلين والعاملين مسجلين زيها واشد منها
وعلى فكرة جرنال الاهرام بتاع يوم الجمعة ورقه كتير وبينفع والله
ولعلمك يا دكتور انت متفائل جدا
عندك امل الواحد يشتغل بعد 30 او 20 انترفيو طاب دي تبقى بسيطة جدا ونبقى اخر دلع
شكلك كدا بتتريق على المخاليق
الا قولي صحيح انت بتعمل للمرضى بتوعك انترفيو الاول
ويا ترى بتوافق تعالجهم بعد كام انترفيو
قصدي بعد ما يدفعوا كام فيزيتا