Friday, February 29, 2008

سنه بس؟؟؟؟؟؟


اول مره اعرف يعنى ايه مدونه كان من مقاله فى الدستور فى صفحة رأى كان فيها جزء من مدونة عاوزه اتجوز
وبدأت بعدها ادور على مدونات تانيه
عجبتنى قوى
باب مردود وكأنت بأحس فيها برومانسيه البنت اللى مبقتش موجوده وكمان روح فانتازيا الرائعه وأسلوب صاحبها محمود العبقرى وطبعا سخرية غاده عبد العال فى عايزه اتجوز
الموضوع عجبنى قوى وفضلت لفتره كبيره ادور ومن لينك للينك
وفكرت ان كلامى البسيط اللى مفيش حد غير اصحابى بيشوفه وبيجاملونى ويقولوا لى انه جميل..... حد مختلف يشوفه ويقول رايه
اى نعم مع الوقت معظم التعليقات بقت جميل ...ربنا يوفقك وكده ...لكن اوقات فيه اراءا بتبقى حقيقيه وتفرح وتخلى الواحد طاير منا لسعاده
ـــــــــــــــــــــــــــــــــــــــــ
مع العالم الجميل ده عشت حاجات مختلفه وعرفت ناس أعتز بيها وبقيت نهم للمعرفه بشكل فظيع
سمعت فيروز بشكل مختلف ...نظرتى للدنيا اتغيرت ...حتى اصحابى فى الحياه بقيت لما اشوف مدوناتهم اكتشف مناطق جديده فى شخصياتهم عمرها ما كانت هتظهر الابالكتابه

يمكن انا مقصر فى حق ناس كتير بس انا مش باحب التعليقات والردود اللى من باب المجامله
انا متابع جديد مئات المدونات بس مش بأحب اعلق ساعات
بيعجبنى قوى براءة
هاجر...وجنون نواره ...ورزانة انونيمس وبأشوف حاجات جديده فى العبقرى قنديل
و
علوه حبيبى


بأفرح جدا لما الاقى بوست جديد عند بنت القمر او الاقيها مختاره بوست من عندى
مش بأرد على التعليقت من فتره لظروف النت لكن والله انا مش متجاهل الناس ولا حاجه وكفايه انكم بتجبروا بخاطرى
ـــــــــــــــــــــــــــــــــــــــــــــــــــ
بأتضايق قوى اما الاقى واحد بيعرف نفسه انه مدون او انى الاقى صفحه فى مجله او جريده بتناقش نفسيات المدونين كأنهم ناس من كوكب تانى
الموضوع بسيط يا جماعه دى مساحه بنتكلم فيها
بس
ـــــــــــــــــــــــــــــــــــ
مصادفه اسعدتنى...ان تبدأ سنه جديده فى عمرك مع عمر هذا المكان الذى اعشقه
كل سنه وانت طيبه


وكل سنه وزويل الذى يشاركنى هذا المكان من وقت لاخر


متالق دائما

Wednesday, February 27, 2008

أقر انا المضحوك عليه


كنت مستنى الاوبريت ده بفارغ الصبر

وعامل له دعايه بين كل اصحابى وزمايلى والطلبه عندى فى الفصل

تغاضيت عن ان زووم هى اللى هتذيعه

وكمان تغاضيت عن ان اسم الشاعر(سيد شوقى )ينفع اسم مغنى شعبى

وان كمان الملحن طارق ابو جوده

لكن انه يطلع بالشكل ده

مقلب كبيييييييييييييييييييييييييييييييييييييييييييير

سمعت بروموهات للاوبريت وشفت استضافة غسان بن جدو لأحمد العريان .....مخرج ومنتج وشاعر وصاحب الليله كلها ..ده حتى كمان بيعلق بصوته ...صاحب المصلحه بقى

المهم كان الكلام مبشر

والاعلانات اللى قبل العرض بشهر او اكتر

وجاءت اللحظه الحاسمه

عدد كبير من احسن الاصوات العربيه ومقدمه تاريخيه مبشره لوديع الصافى ومحمد العزبى ولقطات ارشيفيه مختاره بعنايه

لكن للاسف الكلمات ركيكه جدا

ومكرره بشكل فج ومستفز فوق ما احتمال اى حد

موسى وعيسى ومحمد

الاسلوب ده استهلك فى الكتابه من زمان قوى
والضمير الابكم
وسلاح الشجب معانا شايلينه فى الازمات
مفهومك للحريه ضد حقوق الانسان
كلها معانى استخدمها مدحت العدل قبل كده فى الحلم العربى وغيره منا لشعراء
فين الجديد بقى
بالاضافه الى ان يحيى حقى الموزع كبيره قوى عليه حكاية توزيع اوبريت يضم اصوات بهذا الكم
كمان تقسيم اسماء ضيوف الشرف من الممثلين والمذيعين حسب المناطق(نجوم مصر-نجوم الاردن -نجوم سوريا وكده)
يتنافى تماما مع ان العمل عربى فى المقام الاول


يبدو ان احمد العريان اكتفى بوجود العدد ده من المغنيين ومش مهم بقى... الاصوات واللقطات هتدارى البلاوى دى

وللاسف احمد العريان كان واضح انه بيدس مناخيره فى كل كبيره وصغيره لدرجة المقدمه والنهايه بصوته وهى مباشره بطريقه غبيه

والكلام من نوعية الحاج جرجس ومحمد وحنا اخوات ويلا بينا نصحى ضميرنا العربى ونظبط له المنبه

منك لله يا احمد يا عريان

Sunday, February 24, 2008

آسف جدًا

آسف جدا لكل الناس اللى قصرت فى حقها

Thursday, February 14, 2008

متى تترجم افلام يوسف شاهين الى العربيه؟؟؟؟



من الأول كده أعترف انى قروى ساذج لم أستوعب الرؤيه الفنيه المتفتحه والسيرياليه والحلزونيه لأننى من أبناء المدارس الحكوميه .........خلاص


سيبونى اقول كلامى


أنا مش شايف اي فن فى افلام يوسف شاهين


كلامى صادم؟؟؟؟؟................................


فعلا والله باستثناء رائعه عبد الرحمن الشرقاوى (الارض)وأداء المبدع محمود المليجى لشخصيه محمد ابو سويلم


انا مش شايف اى ابداع او بمعنى اصح مش فاهم حاجه


هل فعلا صلاح الدين الايوبى وقواد جيشه وجنوده كانوا بيتكلموا لغه عربيه فصحى بالشكل ده


لقد هجم الصليبيون يلا بينا نروح نقابلهم


أو مبرره للتعامل الحسن الذى يلقاه اهل الديانات الاخرى فى ظل الاسلام باقحام شخصية عيسى العوام ووصلات الخطب غير المبرره والكلام المباشر أكثر من اللازم



المصير...ابن رشد


سنتغاضى عن اللغه العربيه الفصحى


انم الناس فى العصر ده كانت طيبه قوى كده


كل بنت تقابل واحد فى الشارع تقول له هات بوسه


والناس لازم ترقص فى الرايحه والجايه


وتقريبا الاندلس مفيش حد فيها كان بيصلى ولا اى مظاهر اسلاميه


الاستاذ شايف كده


فيلم الاخر


وحب الام (نبيله عبيد)الشاذ لابنها (هانى سلامه)وهو أمر مقزز وأيضا حشر كلمات عن المعونه الامريكيه



هناك افلام اخرى أتمنى ان تقدم لها معامل انيس عبيد ترجمه او حتى يشوفوا لنا طريقة استعمال


انا كنت باحس ان المشكله عندى وان كل الناس اللى بتتكلم عن الراجل بيقولوا انه مخرج كبييييييييييير جدا بس لما سألت اصحابى لقيت أغلبهم ان لم يكن كلهم برضه مش فاهم حاجه



حاجات بتغيظنى


شرف كبير ان الاستاذ يختارنى فى دور واحد واقف على ناصيه الشارع


انا مش مهم عندى انى مش ظاهرفى الفيلم اساسا كفايه انى باشتغل مع يوسف شاهين ..ده يوسف شاهين يا جماعه


نيللى كريم :دورى فى فيلم اسكندريه نيويورك محورى ...أنا هأرقص وأتباس وأمشى


صفوه الرقاصه :سعيده لاختيار الاتستاذ ليا فى فيلم هى فوضى وهو شايفنى فى دور جديد عليا جدا ...أنا عامله صاحبه بيت دعاره



اكتشافاته العبقريه


طبعا قدم لنا الفنان الرائع خالد النبوى....وظل العذاب من نصيبنا بعد هذا الاكتشاف


وهانى سلامه ومخارج الفاظه وطريقة كلامه وتمثيله التى رفعت نسبتى الضغط والسكر عند معظم المشاهدين


وطبعا الممثل المعجزه اللى كان مع لطيفه فى فيلم سكوت هنصور...وكمية الصفار والبياض لدرجة انى نسيت اسمه


وننوس عين امه احمد يحيى بتاع فيلم اسكندريه نيويورك


تعرفوا لو كان هو اللى اكتشف تامر هجرس انا ممكن اروح اقتله



ولن ننسى انه دمر آسيا اشهر منتجه فى السينما المصريه بعد ان اقنعها بالانفاق على فيلم الناصر صلاح الدين حتى يفوز بالاوسكار


وتسببه فى اصابة اسطورة الغناء داليدا بالاكتئاب بعد ان تفنن فى اظهار تجاعيد وجهها فى فيلم اليوم السادس وهى حالة الاكتئاب التى لازمتها الى ان انتحرت


ارتباط الممثل الجميل محسن محى الدين باعماله حصره فى هذه المنطقه وحينما حاول الخروج من هذه الدائره بعد ان فات الاوان فشل فشل ذريع وترك الحقل الفنى نهائيا


تصريحاته بعد رحيل المخرج مصطفى العقاد ...كان تقريبا ناقص يقول الله يرحمه بس انا احسن منه برضه


Sunday, February 10, 2008

Monday, February 4, 2008

استاذ ان شاء الله

رغم حكايات زملائى الأكبر منى عن أحداث يوم التربيه العمليه الان ان المعايشه أشد وقعا وأكبر تأثيرا والتربيه العمليه لمن لا يعرف هى ماده بكليات التربيه تقتضى نزول الطلاب الى المدارس ليصبحوا معلمين تحت التمرين لمدة يوم واحد كل أسبوع تحت اشراف معيد من الكليه وموجه من وزاة التربيه والتعليم .لك أن تتخيل احساس ابن العشرين عاما وهو يقضى ليلته يحضر درس الغد ويجمع كل النقط حوله حتى لا يفاجأه طالب(شايف نفسه)بسؤال صعب يضعه فى موقف محرج
ثم يذهب فى اليوم التالى مبكرا على غير عادته فى باقى الايام حاملا دفتر تحضيره ليقف لأول مره منتبها فى طابور الصباح وينصح تلاميذه بان يقفوا صامتين ومنتبهين فى الطابور
يدخل الفصل محاولا اظهار الغموض على ملامحه حتى يظهر انه قوى الشخصيه ويبدأ فى شرح الدرس واضعا يده على قلبه ويدعو الله أن تنتهى الحصه بسلام وألا يحدث أى مكروه
حركات عيال
اسوأ مافى الموضوع أن كل هذه الحركات كنت تقوم بها مع المدرسين وأنت فى مثل سن تلاميذك لكنك الان تقف قليل الحيله امام هؤلاء الصبيه بعد أن صرت مدرسهم وبعد أن تطورت اللغه والأساليب
لكن الملفت جدا للنظر هو مستوى الثقافه العامه للتلاميذ حتى فى المرحله الاعداديه ففى احدى المرات حاولت ان اقيس مستواهم الثقافى فكتبت عدد من الاسئله فى المعلومات العامه احد هذه الاسئله عن المصريين الحاصلين على جائزة نوبل فقالت احدى الطالبات أنه الاديب محمد نجيب
أنا طبعا بدأت أشك فى المعلومات اللى عندى ولم أكرر المحاوله
بنات ولا بنين
بالطبع كنت سعيد الحظ لان مدرستى مدرسة بنات فالتعامل مع البنات بغض النظر عن عقولهن أفضل بكثير فهن رحمه من استظراف البنين ومحاولات اثبات الرجوله طبعا بالمشاكل مع المدرسين فزملائى فى مدارس البنين كرهوا التعليم باكمله فالبنت تحاول جذب الانتباه اما بخفة دمها او اجتهادها داخل الفصل او جمالها انما الاولاد باثارة المشاكل والاستظراف والخناقات مع بعضهم وسهل جدا ان تقنع البنت بوقت الشرح والفهم ووقت الكلام والضحك
المدرسه لم تتغير
تغير الطلاب ولم تتغير المدرسه نفس البرامج الاذاعيه وهل تعلم وحكمة الصباح ونفس المجلات اللى كلها شكر لمدير المدرسه والناظر ولن تجد اهتمام بالمواهب اطلاقا فالاهتمام الاكبر للغياب ومظهر المدرسه وبرغم وجود أجهزه الكمبيوتر الا ان التعامل معه مستحيل لان المدرس فقط هو الذى يقوم بهذه المهمه الصعبه
والمناهج ايضا لم تتغير كثيرا فموضوعات القراءه والنصوص والنحو كما هى لم تتغير وكأن جيل بوجى وطمطم -احنا يعنى-تناسبه هذه الموضوعات مثل جيل نانسى عجرم