Tuesday, May 1, 2007

جمال مان ......بقلم زويل

عاوز أسألك سؤال.... لو جتلك فرصه تكون واحد من الرجال الخارقين تحب تكون مين؟يعنى مثلا واحد صاحبى اخوه الصغير نفسه يكون سوبر مان علشان (يتبول)على الناس من فوق(هو الصراحه قال كلمه بيئه عن كده).واحد نمس من أصحابى أختار سبيدر مان علشان يفضل لازق على سطح عماره وراقم المزز واللى تعجبه يلزقها واحد نسيج عنكبوتى يخطفها وانت عارف بقى واحد ظريف تانى اختار يكون بات مان على اساس انه (يابخت من بات مان ولا باتش ومان)انت بقى .....تختار مين؟؟؟مالك متنح كده؟؟؟؟؟أيه انت اصلا متسمعش عن دول ؟ حاجه غريبه ....ده انت غريب قوى يامان طيب ايه رايك فى ادهم صبرى هو ده البطل المحلى الوحيد .وطبعا لأنه مصرى (ومصر يا أول نور فى الدنيا ..وكده)ضرب كل الناس .وفى كل مكان .ده حتى هزأ كوندليزا رايس متعرفوش؟.....على كده بقى متعرفش نورالدين محمول ؟اللى بيحل الالغاز وأول ما يحل لغز عينيه بتنور ولو مشغله على وضعsilentيعطيك viberationبص بقى انت غلبتنى وياك وعلشان كده هقولك على واحد لو معرفتوش هتروح فى داهيه .ايه رأيك تبقى زى حبيب قلبنا جمال باشا بيه مبارك ...ده بقى راجل خارق على حق .ده ابن الرئيس يامعلم يعنى يضرب الارض لو مطلعتش بطيخ من غير بذر يفجروها ....يروح مجلس ادارة بنك البنك يفوز بكل الصفقات ...يمسك شركه لتداول الاوراق الماليه(مش عارف يعنى ايه .بس هو عنده واحده)تتقلب بقدرة قادر لأكبر شركه فى المجال ده .خارق خارق يعنى ...وكل الحكايه خطوتين ويبقى رئيس بعد عمر طويل باذن الله ...وعلشان أؤكد لك ان جمال مان زى سوبر مان وأحسن كمان ...شوف انت لو سوبر مان راح بلده كريبتون هيفقد قواه الجباره ويتحول لسوبر فرط أى عيل هفأ يضحضحه انما جمال مان لا يكتسب قواه الجباره الا فى ارض الوطن .....سوبر مان بقى رمز الشعب الامريكى لانهم اختاروه يبقى كده ...جمال مان بقى هيكون رمز مصر بمزاج الشعب أو غصب عن اللى جابوه ....سوبر مان ميقدرش يتكلم فى السياسه ..جمال مان ايه بقى !!!!!!بيتكلم فى الموازنه وخطه الحكومه مع ان ملوش دعوه بيهم بس راجل خارق بقى ...ده يارجل اتعملت له تعديلات ستوريه لحوالى 1/4الدستور ...وكمان مبيروحش اى حته الا ومعاه 4وزراء على الاقل ......سوبر مان أخره يحب من بعيد لبعيد انما جمال مان أثبت انه مان على حق مش نص لبه سوبر زى التانى وخلاص هيكمل نص دينه فى 4/5 الجاىالمهم..... الحق اخلع يا مان قبل ما ييجى واحد خارق من بتوع امن الدوله ويخلينى من الرجال المخروقين

تم كتابة اسم السيد جمال مبارك بالاخضر ليتناسب مع لون الفجل الجديد

22 comments:

السفاح said...

هايخلوك من الرجال المخروقين.......ههههه مخروق من انهى حته بالضبط .

صاحب الحتة said...

يا عم العمر مش بعزقه وبعدين مين هو جمال مبارك انا اول مرة اسمع الاسم ده
متكنش تقصد جمال حمزة انا قريت الكلام بداعك كل الفهمته منه ان الفجل لونه اصفر
يا ريد تبقى تبص بصة على المدونة بداعتى وتقولى رايك
http://olaybedo.blogspot.com/

بتاع الجاز said...

شكلنا هانروح فى داهيه ايها الرفاقز انا اعلن اننى بعيد كل البعد عن هذه المغالطات والاكاذيب التى تقولونها عن رئيس مصر القادم رئيس الامل فى غد افضل جمال مبارك ربنا يحميه لشبابه ويمص دمنا كمان وكمان.وان شاءالله عمرجمال مش بتع الاسماعيلى لا عمر جمال مبارك يبقى رئيس اولادنا واحفادناوربنا يستر_

g_bouheerade said...

يظهر ان المقالة بتاعتك اتعدت من البطل بتاعها
انا كتبت تعليق قبل كدا ودلوقت اختفى
دي مقالة خارقة بصراحة بتتخلص من الاراء اللي فيها شبهة معارضة
بس نقول تاني ونقول كمان
ماشي يا مان
انا كنت قلت ان المقالة جميلة ومضمونها قوي لكن كعادتك لك تلميحات خارجة شوية اعتقد انك في غنى عنها لعرض افكارك
خصوصا وانك بتعرض مضمون قوي وجاذب للانتباه في حد ذاته
يعني مش محتاج دنيا المؤثرات دي
يا ريت
ولا اقولك بلاش يا مان
وانا اقول ليه هو انا هاعمل فيها جمال مان ويبقى لي في كل مقام مقال

واحد مصرى said...

بداية حلوة و موفقة يا شباب.... ربنا يوفقكم ... و نتقابل في السجن كدة كلنا مع بعض و هناك نجتر ذكريات الشخصيات الخارقة زي المعلم سوبرمان و سبيدر مان و بات مان و ....... انا حاسس اني نسيت حد .... اه افتكرت المعلم فجلة كمان

متغيرة شوية said...

جمال مان
تخيل بقى لو عمل أفلام

gamalman
gamalman forever
gamalman returns
gamalman and alaa ( بدال روبين يعني)

BaTresYa said...

ليه بس بتجيب في سيرة الناس
ربنا يجعل كلامكم خفيف عليهم
المهم انا مش نفسي اكون حد من دول لأني بإختصار ومان :)

e7na said...

السفاح
عيب كده
صاحب الجنه
الفجل اصفر ...ارجع للمقاله تانى هتزعل ابيه جمال منك
بتاع الجاز
متخافش
جميله بو حريد
خفى على زويل شويه

e7na said...

لا اكيد هو مش بيحب الشراكه مش هيرضى يسيب علاء يمثل معاه وبعدين احنا اكيد مش بنتكلم على جمال وعلاء مبارك

e7na said...

batresya
لا فيه فيلم فاشل كده اسمه cat woman

الوردة السوداء said...

ضحكت من قلبى

زى مازعلت برده من قلبى

كلامك وجع

Anonymous said...

batresya ولا تزعلى نفسك
ومان ومان احسن ناس ياوامنتى والله.
وبيقولوا الفيلم بتاع كات ومان ده خد جايزة اسؤا فيلم ف العام اللى اتعرض فيه مع انى اعرف ان فيه ناس كتير كانوا خارجين منه مبسوطين قوى.... هه من اوديون لو هم فاكرين

e7na said...

يمكن السخريه تخفف شويه من مرارة الوضع اللى احنا فيه
شكرا يا زهره

e7na said...

عرفتك من هه دى من غير علامات استفهام ازيك يا ابو اكمل منور المدونه

hamsa said...

خلاص بقي زي سوبر مان وباتمان وسبايدر مان كمان
مش للدرجه دي يا جماعه
الراجل في رقة النسمه
ومتواضع جدا
دي بيتكلم ووشه فى الأرض
بيتكسف
وبعدين سيبكم بقى من الحقد الطبقي ده
يعنى لو باباك رئيس هاتحب انهم يقولوا عليك كده
ياساتر عليكم:D

عبده الميكانيكى said...

انا اخر حاجه فاكرها انى كنت بقرأ المقاله بعد كده مش فاكر حاجه بس اللى انا واخد بالى منه ان قفاى طول خمسه ســـــــــــم .. حد يقدر يقولى ليه ؟؟

e7na said...

همسه
عندك حق لاعب الكره بيبقى نفسه ابنه يطلع زيه والمهندس نفسه ابنه يبقى مهندس زيه وكمان الر...ولا بلاش بدل ما نروح فى داهيه
عبده الميكانيكى
عرفت ان فيه ناس ايدها اتقل من ايدك على الواد بليه اللى عندك فى الورشه

Anonymous said...

ماله جمال ياعم دا احسن واحد فى مصر مش كفايه جاب جونين فى بنى سويييييييف

أبو سويلم said...

اللى انا مش قادر افهمه ازاى تتجاهل ذكر السوبر هيرو عبد الناصر اللى كل الشباب بيتمنوا يكونوا مثله. يا ريت تكون موضوعى اكثر من كدة يا اخ زويل.

Anonymous said...

اخ ابو سويلم ازيك ؟ يارب تكون بخير دايما .
ومعلهش انا مضطر اسال سؤال كالعادة هو حضرتك تقصدك الاستاذ عبد الناصر بلدياتك ولا الاستاذ جمال عبد الناصر صاحب بلدياتى؟؟؟ هه.

زويل said...

الى الأخ السفاح:بعني كل اللي همك مخروق منين؟ياعم عارف الربع جنيه؟............لأ مش زيه يا قليل الأدب يا عم ربنا يكفينا ويكفيك شر الخرقة(الخرقة مرة)
الأخ صاحب الحتة كلامك له معنى من اتنين: يا اما سيادتك عندك مشكلة في التاء بتكتبها دال،أو تكون فاكرني برشام ناموس ايه )يا ريد)دي؟
الى كل من قرأ البوست شكرا بس هو أنا قلت اني بأكره سيادة الزعيم الصغير جمال؟!!!!!!!!!!دا أنا بحبه(مش اعلان ماكدونالدز(

S H A H said...

شكلك هتودينا في داهية, و كل اللي كاتبين كومنتس دول هيتمسكو

بس بجد مسخرااااااااااااااااا

بوست جاااااااااااااااااامد