Saturday, September 8, 2007

نلحق نتكلم قبل رمضان...بنات مصر انضربوا يا رجاله

يلاحظ اى شاب حباه الله نعمة التركيز ما أصاب فتيات مصر-شفاهن الله-من حمى الميك اب والآى شادو والمسكره وغيرها مما ملأ علب المكياج حتى اوشكت بنات نفرتيتى وكليوباترا وحتشبسوت ان يصبحن نسخه بالكربون هى فى النهايه انثى بلا ملامح تحاول ان تبحث عن مسام بشرتها الى ان يعييك البحث ولن تجدها

حتى فى السينما لن تجد الا عدد ضئيل جدا لا يتناسب مع غرائز اى شاب حاسس بشبابه

مالذى حدث؟؟؟؟؟

من بعد سعاد حسنى وشاديه ومريم فخرالدين وشويكار وصباح وهند رستم فى العهد القديم

وميرفت امين ونجلاء فتحى ونورا وشمس البارودى فى الجيل اللى بعده


تصبح نجمات السينما علا غانم ونيللى كريم وداليا البحيرى ومى عزالدين وزينه

بالذمه مش حرام


نيللى كريم اخرها تعمل اعلان لمحلول الجفاف
وداليا البحيرى مش عارف كانت عارضة ازياءازاى بصراحه

اما علا غانم ما اظنش انه فيه واحد مكتوب له فى البطاقه ذكر بيحبها
ومى عزالدين وفضيحة النفخ
نفخ ايه امال قبل النفخ كانت ازاى
وزينه...الله على زينه
نفسى الاقى فى شكلها دليل واحد على الانوثه



حتى فى الشارع حاول ان تبحث عن انثى رقيقه

حولهن المكياج الى صور تسىء الظن بها بدون قصد


عارف ان كل بنت هتقول اهم حاجه الجمال الداخلى والجوهر افضل من المظهر وعلى راى احمد السقا لا عندهم لاجمال داخلى ولا خارجى


على اى اساس يعنى بيهتموا بالجمال الداخلى


منشغلين بمناهضة العولمه مثلا ولا الدراسه شاغله كل تفكيرهم

وترجعوا تزعلوا وتقولوا نعطى فرصه لبنات من نبت الارض الخضرا ومفيش فيكن فايده



لذا الشباب قرر انه يلجأ للاستيراد سواء من بلاد الفرنجه او من اشقاءنا اللبنانين ربنا يخليهم



بالذمه فيه واحده عاوزه تبقى جميله تسمع نصائح امينه شلبايه
كانت نفعت نفسها

24 comments:

ما علينا said...

يا راجل

حرام عليك
يعني انت متاكد ان كل بنات مصر انضربوا

يعني لفيت على البيوت بيت بيت

خلاص مش بتشوف بنات كويسة خالص او محترمة
من غير

الدوكو او اللاكيه اللي منتشر حاليا
مش باقول ان اللي انت بتوصف افترا او ادعاء

لكن في المقابل
في قتيات رقيقات جدا جميلات جدا
بحياءهن وخلقهن
وهؤلاء
لن تجدهم منتشرات في الشوارع

او فلنقول ان الشباب
تلتقط انظارهم
المناظر الشاذة

وبعيدا عن موضوع الميك اب

مسالة الجمال والانوثة عامة هي مسألة نسبية
ليس لها قواعد ثابته

يعني انت ممكن تشوف زينة ليست جميلة
او ليس بها اي دلالة على الانوثة
غيرك يجدها جذابة دا

وكذلك مي وعلا غانم
وكثيرات

الجمال شيء نسبي جدا جدا
ويتدخل فيه مبدأ اختلاف الاذواق
يعني من النهاية

هانقول ان دي وجهة نظرك الشخصية
ممكن ان يتفق معك اخرون ويختلف اخرون

وبعدين
مش البنات بس اللي انضربوا
قياسا على كلامك

الشباب كمان
الشارع مليان
مناظر غريبة جدا

وادوية نفخ العضلات
وتلزيق الشعر بالجيل
او نعكشته وبرمه
وباديهات ولا البنات
والبناطيل الساقطة

كله بينفخ وبيحقن
دي ثقافة منتشرة بين الجيل كله مش البنات بس

ولو على اللبنانيات هم اللي صدروا
ثقافات الميك اب والحقن ومراكز التجميل

وانت بتشوف ممثلاتهم وبس
لكن لا مشيت في شوارعهم ولا عشت وسطهم
اكيد عندهم سلبيات زي هنا بالظبط

واعتقد بسهولة جدا
البنات هايقوللك
انت بتقول فين شمس البارودي وشادية
ومريم فخر الدين

هايقولولك
فين رشدي اباظه وعمر الشريف واحمد رمزي
وشكري سرحان ويوسف فخر الدين

دلوقت النجوم
محمد سعد وهنيدي واحمد ادم وريكو


يعني بمعنى اصح
كله في الهوا سوا


ومرة تانية هاقولك

الجمال شيء نسبي كل واحد له نظرته
اللي انت تشوفه جميل غيرك ممكن يشوفه قبيح
واللي انت تشوفه قبيح غيرك ممكن يشوفه جميل


ووازن نظرتك
يعني انت ليه بتبص على الوحش بس

في ناس كتير داخلها فعلا كويس وجميل
ومحترمين
من غير لا ميك اب ولا دهانات


والغالبية العظمى

مهما بيشوف
بيرجع ويقولك مفيش احسن من بنت بلدي


سياسة المستورد نادرا ما بتفلح



شفت تعليق يالمتر اهو
سلام

hoda omran said...

احمد شكلك عايز تتخانق
:)
اطلعلى برة
هاه مش ليا دعوة

:::::::::::::::::::::::::
طبعا طبعا طبعا
مش موافقاك خاااااااااالس
خلى بالك اللى بينفخ هو اللى بيعجب الايام دى
والدليل نانسى واليسا

بتاع العسل said...

من وجهة نظرى

انا فكرت فى موضوع المستورد
لقيته يعنى 1% وانت شفت بنفسك

فخلينا فى اللوكل بس ركز


واوعى تقع مرة واحدة

سلام

حسن مشالي said...

بصراحة ماعلينا
جابت من الاخر
وخلتننى معرفش ارد خالص
ورينى انت هاترد ازاااااى
وكل سنة وانت طيب

أبوسويلم said...

والله للاسف الموضوع اخطر بكتير مما نتصور
الموضوع ثقافة شعوب انحرفت تماما واتجهت للغرب اتجاها تاما دون ادنى وعى
وانا ارى ان غياب الوازع الدينى هو اكبر سبب للمسخرة اللى بنشوفها فى كل مكان
لكن لو خلينا الدين على جنب شويه علشان اخوانا بتوع التقدم والتأخر والتخلف والكلام ده
نلاقى ان ضعف الشخصية واقصد الشخصية العربية والاسلاميةو عامةوشخصية كل بنت خاصة
ضعف الشخصية هو السبب يعنى بميزان العقل والانسانية تسوى المغنية الفلانية علشان اقلدها ويبقى نفسى اكون شكلها وتلاقى ع الشات فى الفضائيات
شبيه رشدى اباظة وشبيهة اليسا ونانسى وشبيه الريح وكلام فارغ
وده طبعا لضعف الثقافة
البنات اصبحوا بقدر من التفاهة لايعقل
اللى بيغمى عليها لما تشوف تامر اللى متهرب من الجيش وده ليه اسم الشباب عارفينه وترسخ اكتر لما دخل السجن اللى عملوا حملة تضامن علشان فك اسره
والله تفاهة
وماعادش فيه ثقة بالنفس عند البنت لانها مش عارفة ان لها دور ريادى فى حياة بلدها او مجتمعها
كل اللى عايزاه تلاقى شاب شنكوت ويسرحوا مع بعض فى الشوارع والحدائق يحبوا فى بعض وبعدين يديها الصابونة وهلم جرا
كلامى ده مش على الكل لكن انا شايف انه للاسف عن الاغلبية من وجهة نظرى
وأكيد فى الجانب الاخر الرجالى فيه نفس العيوب لكن بشكل اخر
كنت هاطول يا ابوحميد لكن ربنا ستر
وع العموم مفيش مشاكل
سلام

بتاع الجاز said...

ان البنات فى مصر يستغلون شئ من اثنين لدى شبابنا
1-تفاهه الشباب وعبطه زى العيل العبيط اللى ترميله اى لعبه يفرح بيها حتى لو شكلها وحش


2-حالة الهياج العام التى يعيشها الشبا فى الايام السوده دى لدرجه ان واحده زى عائشه الكيلانى ممكن تكون فى نظرهم مثيره نتيجة الكبت الشديد وعدم القدره على الزواج




بوست رائع

Abeer said...

ما علينا ..
مفيش كلام بعد كلامك

من الاخر اللي عايز فاطمة لازم يكون على

وسيبكم باة من الكلام الروش ده

وبعدين حضرتك مخاصمنا ولا ايه
بقالك زمان مش بتطل علينا

دكتور كسلان said...

فى الاول عايز اقولك
انى مش هاقدر اكتب تعليق طويل زى الناس اللى سبقونى
اولا فيه ناس بتعملى محاضر وشكلها كده هتحولنى ع النيابة
ثانيا انت عارفنى كسلاااااااااااااااان

بالنسبة للبوست
بالراحة شوية ع البنات
هتزعل الناس مننا
انا معاك ان البنات ليومين دول مظهرهم بقى مش ولا بد
خصوصا الممثلات
اللى محدش يرضى يبصلهم

بس الاخطر من كده
الاخلاق
بقت زى الزفت
ربنا يستر علينا


بس ارجع واقولك
زى ما فيه فساد
فيه التزام
واكيد فيه بنات كتير حلوة
واخلاقهم ممتازة
الدنيا فيها لحلو والوحش

ادعيلى بقى ان الاقى بنت الحلال الحلوة
وتكون اخلاقها حلوة

ده طلع تعليق طويل
رحت فى داهية

سلااااااااااااام

ما علينا said...

الحسابة بتحسب يا دكتور

وجنت على نفسها براكش

خيرالدين said...

ما علينا
ماشاء الله
انت متأكده ان لوحة المفاتيح اللى عندك طبيعيه
كلام حضرتك معناه ان الدوكو واللاكيه بس هو المشكله
وفراغ العقول
يمكن فيه بنات مش مشتركه فى جريمة البويات دى لكن متلبسين بجريمه اخطر
اولها تهاونهم فى عقولهم وتفكيرهم وشكلهم
فالحكايه كلها راحت من ايديهم
يبقى الشاب مننا يعمل ايه سعادتك


ربنا يبارك لى فى تعليقاتك


همسات

ايه يا هدى وانت زى الناس دى يعنى؟؟
وانا يدخل عليا النفخ برضه


بتاع العسل
الله عليك وعلى وجهات نظرك ياعسل انت

خيرالدين said...

حسن مشالى
لا انا عاوز رايك انت مش راى ما علينا

ابو سويلم
عندك حق بس بالاضافه لغياب الوازع الدينى
فيه فقدان الثقه خاصة مع زيادة نسبة العنوسه واللى تخلى البنات تفكر انها اما تلبس الالوان العجيبه واللبس الغريب ده هيخليها تلحق القطر
كمان انتشار الفضائيات
منها لله الوصله بقى
ومحاولة تقليد الاشكال اللى فيها


يا سيدى انت تطول زى ما تحب

بتاع الجاز
الله عليك يافاهمنى انت

والشباي بيصدق
زى البطله القوميه مادلين كده

abeer
ماشى
تقصدى ايه؟

اسف على التقصير فى حقك

دكتور كسلان
والله انا بادعى لك بس انت تبطل الكسل اللى بقى فى دمك ده

ما علينا said...

ما انا قصرت التعليقات
قلت اني زعلانة منكم

ولما رجعت طولتها
يظهر انك زهقت بسرعة وماكملتش قراية
ويدوب اخدت وش القفص

مع ان انا غير كل البياعين
البضاعة الكويسة عندي باخليها في قعر القفص
عفوا
في نهاية التعليق

انا في النهاية قلت لك
ان بعيدا عن الميكب والحاجات دي
في ناس كتير جدا داخلها جميل وكويس

ومعنى الجمال الداخلي عندي
هو جمال العقل والروح
يعني ناس مش متهاونة في عقولهم ولا حاجة

وعموما
انت البوست بتاعك تقله كله
على الشكل والنفخ والحقن

وعلى نظريتك الشخصية للجمال
من كون زينة مفيهاش انوثة
ونيللي كريم عندها جفاف
انت كنت مركز على الشكل اكتر من الداخل

وبالرغم من كدا
تعليقي احتوى في مضمونه على اهمية الداخل

وان في ناس كتير جدا
تستحق الاحترام
لمجرد اخلاقها وفكرها
واعتقد ان استخدامي لككلمة مجرد غير صحيح

لان الاخلاق والفكر كفاية جدا جدا
والاخلاق لوحدها كفاية مش محتاجة
دعم معاها علشان احترم الشخص سواء بنت او ولد


وعلى فكرة لوحة المفاتيح عندي
فعلا مش تقليدية

هي عبارة عن لوحة بلاستيك
يعني ممكن تطبها وتحطها في جيبك لو كبير شوية

Unknown said...

أظن جميلة قالت كل اللي المفروض يتقال بس انت شد حيلك ورد علي كل النقط اللي هي اتكلمت فيها


ربنا معاك

maioya said...

انا معاك ان الميك اب
وغيره انتشر والاغلبيه العظمي
من البنات بتحطه
بس بنات كتير مش بتحط
ومش معاك ان مفيش بنات مصر
ياعم ده انت كده بتعيب وتغلط
فينا بردو:$
لابجد هوا الجمال عامه نسبي
بيختلف من واحد لواحد
انت ممكن تشوف واحده حلوه حد تاني يشوفها مش حلوه والعكس
وبعدين في حكمه بتقول الجمال في عين الناظر مش المنظور اليه ;)
مفيش بنت اتخلقت وحشه
بس في حد بيشوفها وحشه وحد بيشوفها اجمل واحده في الدنيا
رمضان كريم كل سنه وانت طيب:)

Unknown said...

آه صحيح

نسيت أقولك (باريس هيلتون) اللي انت حاطط صورتها في أول البوست دي لسة طالعة من السجن كانت ممسوكة في قضية سواقة تحت تأثير الكحول وتقريبا المخدرات والله أعلم

ياريت نبقي صرحا مع نفسنا شوية ونقول احنا بندور علي ايه بالظبط جمال خارجي ولا داخلي وايه المهم أكتر بالنسبالنا

ولو جمال خارجي بس تبقي محلولة وسهلة جدا مش زي مانت متخيل

تعرف فكرتني بواحد زميلي كنت بتناقش معاه مرة وقاللي انه البنت اللي يتجوزها لازم تكون استايل
الأستاذ لما ييجي يفتح بيت هيدور ع الستايل
وأنا مش ضد الشياكة ولا هذا المسمي بالستايل
بس أظن في حاجات أهم بكتير قوي
بس احنا الأول نكون صرحا مع نفسنا عشان نعرف نختار
صح أو غلط بقا دي مسألة نسبية ترجع للي بيفكر وبيفكر ازاي وبيفكر في ايه

بس لازم تكون علي أساس من الصراحة مع النفس في الأول

3abdo me7tas said...

عندك حق فى كل اللى انت بتقوله والله
انا مش عراف لو الميك آب ده البنات بطلته هيموتو ولا حاجه
ماله الجمال الطبيعى
المشكلة انك بتلاقى دلوقتى المحجبين لازم يحطو ميك آب وآى شادو ومش عارف ايه
طيب والحل
انا بقول احنا نطلع طلعه كده على أى دول خليجية او اروبيه حتى نشدلنا اتنين حلوين بدون نفخ وبدون ميك آب مبالغ فيه
ونكمل نص دينا بقى
أنا مستنيك عشان نروح مع بعض
متبعنيش بقى

خيرالدين said...

ماعلينا
لو سبنا الشكل شويه
حضرتك شايفه ان فيه ممثله من اللى انا ذكرت اسمهم لها اى نشاط تانى
يعنى جمعيات خيريه ...مواقف أو اراء سياسيه
مدونه حتى على الانترنت
لغتهم اللى بيتكلموا بيها فى اللقاءات التلفزيونيه كانهم كلهم شخصيه واحده
نسيبنا من الممثلات
نشوف البنات العاديه
حاولى تدورى على قدوه للبنات فى العصر الحالى باستثناء نهى الزينى وهبه رؤوف عزت اللى ماظنش ان نسبه كبيره تسمع عنها
اخر مره سمعتى عن بنت لها موقف فى كليتها او قالت لا فى انتخابات اتحاد الطلاب
او حاولت تغير
اى نعم فيه ولاد برضه كتير مقصرين بس انا بأرد على كلامك

صديق عزيز جدا على قلبى سأل طالبه عنده فيه القسطنطينيه قالت له على طريق اسكندريه
ثقافة البنات لا تتجاوز مجلة عين ووشوشه واخبار النجوم
انا باتكلم عن الغالب يا استاذه


لاخلاق طبعا مطلوبه
لكن الفكرالجيد مطلوب

وعارف كمان ان شخصيات مشهوره ومؤثره من النساء مش جميله قوى بس الجاذبيه والتفكير هم الاكثر تأثير
ياريت اكون وصلت وجهة نظرى

خيرالدين said...

may

نقدر نعيب فيك يا جميل
وبعدين اهل المنصوره اصحاب الجمال الطبيعى
من غير اى صناعيات


فنان فقير
بغض النظر عن انك ذكرت كلمة صراحه ومشتاقتها حوالى خمس مرات فى التعليق كأن البوست كله كنت باكدب على نفسى
هاكون صريح مع نفسى واقولك
ان مش معنى ان الانسان يبقى مثقف او تفكيره عالى انه ينسى هندامه وشكله
يعنى يحاول يوازن الامور لا يسيب دقنه ويطول شعره ولا يبقى ماشى زى الطاووس
فى المعقول

اه من احواء

خيرالدين said...

فنان فقير
وانا يعنى قلت ان باريس هيلتون بتخطب فى جمع هناك مانا عارف انها كانت مسجونه

عبده محتاس
سلامتك من الحوسه
على فكره الخليجين برضه بقوا كلهم بينفخوا
احنا نطلع على سوريا
استنى فى الموقف

Unknown said...

وهو أنا قولت لا سمح الله انه لازم البنت تبقي مبهدلة عشان تبقي بتفكركويس؟

ياباشا لازم يكون في أولويات في حياتنا لازم نعرف احنا عايزين ايه أكتر الشكل السوبر ولا العقل السوبر والأخت باريس هيلتون اللي انت حاططها دي لو هنتكلم عن الشكل وبس ياسلام مفيش بعد كدة شيل قناع الشكل بقا وماخفي كان أعظم


الناس المتربية واللي بتلبس كويس واللي عقلها مافيش بعد كدة كتير بس أنتوا حاولوا ان أقنعة الميك آب اللي بتشوفوها ماتزغللش عنيكوا وانتوا تشوفوا كويس

وأرجوكوا ابعدوا عن السطحية في الاختيارات عشان تعرفوا تفتحوا بيوت وتخلفوا عيال تعرفوا تربوها كويس


آه من آدم

Unknown said...

الا قولي صحيح هي الصورة التانية دي بتاعة مين؟

خيرالدين said...

فنان فقير

انا عن نفسى محتاج الاتنين بنفس الدرجه

والصوره لمغنيه لبنانيه اسمها ساندرا
وحشه
صح؟؟

Bella said...

الورود لن تجدها على نواصي الشوارع

الجواهر المكنونة في بيوت اهلها ولاتتسكع في الشوارع والطرقات

من تراهن لايعبرن عن الجمال الحقيقي

بل الجمال السيليكوني المصطنع الذي يحبه الكثير من الشباب

اما المحترمات الجميلات الحقيقيات الرقيقات فلن تراهن لانهن في بيوت اهاليهن

تحياتي

Bella said...

نسيت اقول لك ان الجمال الداخلي والبنت المثقفة الذكية التي تتمتع ايضا بجمال خارجي ولكن طبيعي بدون مساحيق لاتعجب احد بل تكون مثار سخرية الكثيرين باعتبارها خفير والشاويش نفيسة ومدام كوري وباقي التشبيهات اياها

وكفاية جدا الدراما بتصور ان البنت المثقفة الذكية دايما مبهدلة او مسترجلة او بتزعق وتشخط او شخصيتها مهزوزة

وعمرهم ماجابوها ناجحة في شغلها وحياتها
بالعكس لو ناجحة في دراستها تبقى مبهدلة وشكله يقرف

ولو ناجحة في شغلها لو كبيرة شوية تبقى عانس او فاشلة في حياتها الاسرية

مجتمع مريض سقيم الفكر طبيعي جدا يفرز شباب لايعجبه الا المنفوخات والمشدودات والملطخات بالمساحيق

وهذا المجتمع هو من يرتدي شبابه الغض بنطلونات تكشف جزء من ملابسهم الداخلية بسماجة منقطعة النظير
وهو نفس الشباب الذي يرتدي قمصان حريرية ملونة وبنطلونات محزقة وباديها
ويمشي في الشوارع بالشورت وكأنه بيتمشي على البلاج

شباب رقيع صراحة يحتاج لتربية

كما تحتاج نفس البنات المتلطعات في المولات وعلى الكافيها

وكفاية كده ورمضان كريم