Friday, September 14, 2007

لانها ليلى






المراه تصنع من زوجها رجلا عظيما بنفس الطريقه التى تصنع بها الكلاب المسعوره بطلا فى الجرى




أحمد خالد توفيق


فضلت هذه البدايه فى هذا البوست بعد مرور عام واحد على مدونة كلنا ليلى لاثبت ان مقال صديقى زويل ليس الا محض سخريه


فمن منا يتحمل الحياه بدونكن؟


!!!!!!!!




فتش عن المراه عباره خالده تعبر عن ضلوع المرأه كسبب رئيسى فى اى كارثه وانها وراء اى مصيبه ان لم تكن هى المصيبه ذاتها لم أدرك صدق وحكمة هذه العباره الا مؤخرا .ليس مع آخر مقلب من انثى كما يحلوا لسريعى الاستنتاج منكم ان يتخيلوا بل بعد اطلاعى على خلفيات الكثير من حوادث التاريخ وآراء الفلاسفه




فلنراجع معا بعض حوادث التاريخ


لماذا قامت حرب طرواده؟ -اللى كانت فى فيلم براد بيت-كل الحروب دى قامت علشان ننوس عين امه باريس هرب مع الاخت هيلين والتى كانت اجمل واحده فيكى يا يونان وقبل ما تتجوز -ايوه يا ختى مش اتجوزت من 4سنين وجوزها سافر السعوديه-المهم قبل الجواز عملوا مسابقه عل اللى هيفوز بيها لما جوزها فاز اقسم بالتربوء والتربااتو وشلح ابوللو انهم هيدافعوا عنها وعن الجوازه دى فى اى وقت وضد اى حد ..قوم ايه ؟...لما جوزها لقاها هربت لم الناس وطلع على طرواده اللى هى بلد باريس ودى بلد صغيره على بع 3كيلو من مزلقان اثينا وشوف بقى الحرب استمرت 20سنه واخيل مات وهيكتور مات-الراجل اللى اتسحل فى الفيلم-والمدينه كلها اتدمرت كل ده علشان هيلين




سامع صوت بناتى مسرسع بيقول ان ده كلام اساطير..ماشى ياستى مع ان العلم اثبت ان طرواده مدينه فى تركيا كانت موجوده فعلا فى يوم من الايام ...طيب




تقولى ايه فى كليوباترا ؟؟


رخيصه بس مليانه نشاره وحاميه


لا مش دى


طيب عارف يوليوس قيصر اه الراجل اللى كان بيجى فى كل الافلام لابس عبايه بيضا ...الراجل ده كان اجدع واحد فى روما -قبل ما توتى ييجى الفريق بس المشكله انه حب كليوباترا -مكنش فيه مارلبورو ايامهم -وحارب بسببها روما كلها لحد ما قتلوه تقوم كليوباترا تهمد لا ازاى تلف على انطونيوس وتخليه يحبها وتحرضه على الحرب مع اوكتافيوس ويقعدوا يطحنوا فى بعض لحد ما يموت انطونيو هو كمان وتبقى مدوباهم اتنين وتنتحر هى كمان






كل سنه وكل ليلى بألف خير




زويل

23 comments:

saloma said...

its m'first time her
but i liked this post so much

خيرالدين said...

thanks for your visit

and try to visit us many times

ta5areef said...

ليلي
حد يقدر يتكلم ع ليلي

فعلا هى زى كليوباترا
بتتعب وتجيب المرض

علوة said...

يا عمنا اللذيذ
لا احنا نعيش من غيرهم
ولا هم يعيشوا من غيرنا

حلو حوار الكليوباترا ده
حسبي الله ونعم الوكيل في ايسترن كومباني
وفينا بصراحة

كل سنة وانت حلو
رمضان جميل

صباح الفل

ما علينا said...

واسيب شغلي واسيب عملي
واروح اسرح ورا الجملٍ

دي احدى ليلات هذا العصر
في ردها على قيس العائد من الماضي

مش بيقولوا القط مابيحبش الا خناقه

وبعدين
مهما
تلاقي ناس تطلع
تعارض وتقلل من اهمية وجود
قيس او ليلى
فكل كلامهم عديم المعنى

ربنا خلقنا ذكر وانثى
وهو الحكيم العليم

كليوباترا بقى او سوبر
ميريت حتى

المهم
ان زي انت ماقلت
لابد من ليلى
وكذلك لابد من قيس

ما علينا said...

مبروك التجديدات
والنيولوك

مش كنت تخليها قرب العيد
وتبقى تجديدات العيد

ولا دي تجديدات رمضان وفي تاني قرب العيد

GWAD said...

عزيزى أن ليلى توجع القلب
ونسهر نفكر فيها
ونلعنها احيانا
بس بنحبهااااا
عاشق لليلى بجنون

Marwa Friday said...

أهلاااا يا أحمد
على الله يكون البرد راح
ليلى هو في أجمل من ليلى ..ياااه بس فين ليلى يا أحمد؟..أحمد ولا زويل ؟!..عامة مافيش حد يقدر يعيش من غير حد ..عايزة أعمل حركة اسمها كلنا قيس ..والله فكرة! تحياتي لك ولولاد النهارده ودمياط كلها

أبوسويلم said...

والله فكرتنى بالشاعر الجاهلى اللى قال
اذا ستمسى بلا ليلى حكاياتى
والواقع انها بتمسى وتصبح بلا ليلى
معاك انهم سبب كل المصايب على مر التاريخ
لكن على راى احمد عيد
سيبهم اهم عاملين جو
وياسيدى سيبك من كليوباترا
واشحت ميريت
سلام

كلبوزة لكن سمباتيك said...

هي ليلى كده عند الراجل الشرقي زي السجاير لا يقدر يستغني عنها و في نفس الوقت تتعبه
طيب الراجل بالنسبة لليلى ايه؟
ممكن تستغني عنه لو تقدر تصرف على نفسها و تعيش مرتاحة من غير وجع قلب
مفيش داعي اجيب وصف مادي

رمضان كريم

Dina Samaha said...

اول زيارة ليا هنا
بس بلوجكك لذيذ اوى وجميل

واسلوبك فى الحكى والسرد زى العسل

ممممم بس ده لايعنى اطلاقا وبالمرة انى متفقه معاه
:D:D

كل سنة وانت طيب :)

خيرالدين said...

اسف على التأخير
وانا هأرد فقط على الزوار بالنيابه عن زويل ياريت تسمحوا


تخاريف دكتور

بذمتك ليلى زى السجاير
دى حتى خفيفه وضررها قليل


علوه
على باشا قنديل فى مدونتى
انا هاقول للاولاد ان عمهم على زار المدونه دى وكان بيعلق على كلامى
لما تبقى رئيس تحرير ان شاء الله

خيرالدين said...

ماعلينا

ياتعليقاتك القصيره

اولا يا ستى انا قلت ان البوست ساخر وليلى وفكرة مدونة ليلى وكل من يحاول ان يغير من حال المرأه المقهوره من مجتمعنا له من ا كل احترام وتقدير


وعارفه ميريت ايه الثقافه الى انت فيها


انا مرديتش استنى اعمل الالوان الجديده على دخلة العيد
رمضان اولى

خيرالدين said...

gwad
ومن منا لا يعشقها بكل تفاصيلها
وجنونها فى اغلب الاوقات
منورنى



مروه جمعه

الحمد لله البرد راح بتعليمات يا دكتور
وانتزعت منك تعليق ده انا كده اعيا كل يوم
دمياط بتسلم عليك يا بنتى
بس هم زعلانين منك شويه علشان البوست الاخير
خديجه بنتنا ومنرضاش يبقى لها ضره
وكريمه من الشرقيه

خيرالدين said...

ابوسويلم
بغض النظر عن انى-لفتره بسيطه-كنت من معظمهم الا انى رجعت لصوابى وانضممت للجموع المتفرجه مره اخرى
والله يا اخى مافى احلى من راحة البال
وتمسى حكاياتى بلا ليلى او سوسن او اى انثى



انما الميريت دى تخصص صاحبنا يا معلم



سمباتيك

يعنى يا استاذه هو احنا لازم نكتب عن ليلى علشان تزورينا

منوره

dina
اختلافك معنا

ده احنا نختلف معاك كل يوم طالما هتزورينا
تعالى انت اختلفى بس واحنا فى قمة السعاده

bob said...

ما بلاش اللون ده معانا لهتتعب اوى ويانا ولا احنا عشان مش قدك بتبيع وتشترى ف هوانا
بتهيقلى ان ده انسب رد ع اللى مكتوب؟
ولو كانت حواء زى السجاير ومال ادم يبقه زى ايه؟

خيرالدين said...

bob

يعنى حضرتك بتطلب تغيير اللون
يمشى بمبى؟؟؟

بنت مصرية said...

نعم هيلين وكليوباترا كانا نساء

وكذلك هاجر ام اسماعيل
ومريم العذراء البتول
وخديجة بنت خويلد
وفاطمة بنت محمد بن عبدالله
وعائشة بنت ابي بكر
وام سلمة
وام عمارة
كن نساء بألف رجل،الخير فيهن ولهن ومعهن

وعندك كمان رجال زي ابو جهل نيرون،وهولاكو ونابليون وهتلر و بوش،وبن لادن ومبارك

خيرالدين said...

بنت مصريه
منوره المدونه
الموضوع زى ماقلنا مجرد سخريه
والحكايه مش رصد للفاسد فى الجنس النسوى فكل جنس من الاثنين به الصالح والطالح
شرفنى تعليقك

بنت مصرية said...

واضح من صيغة البوست انه سخرية
بس مش هي دي الطريقة اللى اتعودنا عليها في الكلام على الستات بردو
:)
بالتالي اللى بيقرا بتترسخ جواه الافكار دي.. وبجد بجد بقى يإلمني الاستمرار في النوع ده من السخرية لأنه مابيحلش ازمة، بيدعمها
فحبيت احط تعليق عشان اللى يقرا كلامك عن هيلين وكليوباترا يفتكر ان فس ستات غيرهم يعني :))

hoda omran said...

لالالالالالالالالالالالالالالا
انت زودتها اوى
ولا عايزنى أعدلك بلاوى أدم
::::::::::::
مش هتخلص

خيرالدين said...

بنت مصريه
المدونه مدونتك واتفضلى قولى اللى انت عاوزاه

خيرالدين said...

همسات

كلامك موجه لزويل طبعا