Saturday, August 18, 2007

عمرو سمير عاطف...شمس بلادك وجدودك


تخيل الجميع ان مؤلف بكار عمرو سمير عاطف سيقتصر على مسلسلات الأطفال الا أنه فاجأنا فى العام السابق باشرافه على ورشه عمل المسلسل الكوميدى الخفيف راديو ستار اللى كان بينقل صوره المحطات الاذاعيه وكان له نسبه مشاهده عاليه ورغم تفوقه فى مجال الكتابه للاطفال من خلال اشتراك مع الراحله الدكتوره منى ابو النصر فى مسلسل الاطفال السندباد البحرى واللى كان بدايه انطلاقه رغم انه لم يكن المؤلف الوحيد له بل كانت مجموعه عمل الا انه ظهر مع بكار .وعمرو مع بكار فى كل عام يضيف أشياء جميله تجذب الكبار قبل الاطفال وبيناقش حاجات مهمه جدا لكن بحرفيه شديده ومن غير نصائح مباشره تصيب الاطفال بالملل وتفكرهم بطابور المدرسه وتحس انه بيحاول يعرف الاطفال على بلدهم من غير رحلات بدايه من النوبه اللى هى أرض المسلسل ومرورا بدمياط والقاهره وسيناء والاستفاده من أرضهاوالعديد من المحافظات .والجميل كمان فى كتابته لبكار انه مش بيقدم بطل خارق لا طفل زى اللى بيتفرجوا بيغلط ويتعلم ويسأل وبيلعب مع أصحابه .أما السنه دى قدم لنا مسلسل كوميدى جميل وهو تامر وشوقيه المسلسل تمت كتابته من فتره ليست قصيره وهو من نوعيه تلفزيون الواقع وهذه ليست المره الاولى التى يتم فيها تمصير هذه التجربه لكن مع عمرو كانت التجربه بروحه مصريه جميله مع نجوم قدموا أدوار جديده عليهم ونجوم جدد بيحاولوا يثبتوا رجليهم وكمان السنه دى هنشوفه فى مسلسل سيت كوم مع اشرف عبدالباقى

عمرو من أبناء محافظه دمياط ودرس اللغه الانجليزيه الا انه فضل مجال الكتابه وتميز فيه

8 comments:

ما علينا said...

دا تعصب بقى

علشان ما هو دمياطي

بس بصراحة
بكار تحفة انا بحبه جدا
وهو انجاز جميل جدا

وتامر وشوقية
كوميديا خفيفة ومن واقع يومنا
ولذيذ فعلا

واذا كان هو صاحب الحاجات الجميلة دي
لا يبقى يستحق

وجميل اكتر منك
انك مهتم بناسك واهلك

بس حقيقي بتحب بكار
كنت بقول انا بس
اللي غاوية
بكار ورشيدة والجدة بخيته

خيرالدين said...

عارفه لما محمود عزب كان بيقلد يوسف شاهين وقال للمذيعه انا اسكندرانى عاوزانى اعمل فيلم اسمه راس البر ليه ولا جمصه كمان وكمان


انا بجد والله مش متعصب بس انا حاسس ان عمرو سمير مش واخد حقه حتى من الاستضافه فى البرامج التلفزيونيه على عكس اشكال تانيه كتير حفظناها من كتر ما بنشوفها

شكرا على اهتمامك بمتابعة المدونه واسف جدا لتقصيرى فى حقك مدونتك وتعليقاتك

loza said...

بجد بكار مسلسل ظريف جدا ... وقصته حلوه وشيقه
عموما هتدخل عليهم قريبا شخصيه هنديه حلوه جدا ..
انا متاكده هتعجب الكل ...

تحياتي ..

ما علينا said...

انا لما قلت لك قبل كدا
اني باعتبر ان المدونة هنا
هي المدونة الام
ما كانش كلام لمجرد المجاملة

ماتنساش ان اول خطوة لي
في دنيا التدوين كانت من هنا
اول تعليق كتبته هنا
عرفت يعني ايه مدونة
من هنا

وكوني بتابع هنا
لان هنا يستحق المتابعة
انت يا احمد
اسلوبك المقالي رائع
وطريقة عرضك كمان للاخبار القصيرة والموجزة

ويا سيدي انا مزاجي اني اتابع المدونةهنا
انت زهقت مني ولا ايه

دا انا حتى مش بارغي كتير
عندكم علشان ما تزهقوش مني

بس المرة دي رغيت
لان
اعتذارك زعلني
وانا زعلي وحش

انا بازورك واعلق عندك
لاني باحب اقرا لك

مش علشان تيجي تعلق عندي
ممكن اللي انا باكتبه
مايشدش ناس انهم يعلقوا
ممكن اكتب حاجة تانية
يحبوا يعلقوا عليها
عادي
الموضوع مش مجاملات بنتبادلها

اخر الرغي دا كله
انك تسحب اعتذارك دا

زمانك بتقول كان ارحم اروح اعلق
بدل الرغي اللي صدعتك بيه دا

بس انت اللي جبته لنفسك

تصدق انا كنت جاية على اساس انك منزل جديد
ما انت عودتني اني تقريبا الاقي جديد بشكل يومي


اسيبك بقى

بس على قلبكم برضوا

سلام
وراجعة
جهزلي الجديد بقى
علشان اجي اعلق

اوعدك هيكون تعليق صغنتت

انا مش ناقصة
قر وتقطيم
من تخاريف وكسلان

-_- said...

بكار هو الانتاج التلفيزيوني الوحيد اللى بحترمه يمكن عشان مصري خالص

ktr7ercom said...

موضوع جميل جدا
والمدونة حلوة ... احييك على مجهودك

____________________

طبيعي ان يكون عمرو سمير عاطف مبدع لأنه من دمياط
ودمياط أساسا كلها عباقرة .

__________________________

مسلسل بكار من أجمل مسلسلات الأطفال
وأهمها نظرا لما يحمله من قيم وسلوكيات
من خلال قالب درامي شيق
وله دور كبير في تنمية سلوك الطفل وتثقيفه.

خيرالدين said...

loza
شكرا على الزياره الجميله


ماعلينا
بغض النظر عن معاناة هذا التعليق من القصر الشديد الا انى بجد مش عارف اقولك ايه
اولا رايك فى ان التعليقات مش معناها انى علقت لك يبقى انت لازم تردها لى وتدخل عندى لان فيه ناس كتير مفكره الموضوع كده
ثانيا من ملاحظتك انى بانزل بوست تقريبا يوم ويوم
لان مش هدفى عدد التعليقات ولا عداد الزوار يمكن تعليق حد فهم انا اقصد ايه من الكلام يغنى عن ارقام كتير
وبيضايقنى قوى اما الاقى واحد دخل وكتب بوست جميل
وخلاص كده
المهم
ايه الرغى بتاعى ده


sharm
علشان كده هيوقفوه زى اى حاجه حلوه بيعملوها وبعدين يلاحظوا انهم غلطوا فيبدأوا يشوهوها

shokria
شكرا على المجامله الظريفه
بتعملى الخط ده ازاى؟

ما علينا said...

الخط بيتعمل

مع ضغط shift+ حرف ت

مع بعض
جرب كدا وشوف

بذمتك دا رغي
انت بقي بتعمل اسقاط على

بس انا مش هابطل رغي


ابقى جرب الخط بقى