Wednesday, June 13, 2007

الحلقه الاولى.........لو لم اكن فهلوى

هى خصلة يرى المصرى انه المتفرد بها دون غيره وحقا هو كذلك .انها الفهلوه وتفتيح المخ .فالمصرى يرفض الاعتراف بعدم معرفته بشىء ما فهو خبير وموسوعى فى كل مناحى الحياه

يفتى فى امور الدين فى اول جلسته وتتشعب منه الافكار ليروى كيف استطاع ان يصلح سيارته دون الحاجة لميكانيكى وكيف ان ذهنه الحاضر قد كشف له مؤامرة امريكا ببناء حائط الصواريخ فى البلدان الاوروبيه ثم يدلى بصفته متخصص فى الاغذيه بان الاطعمه الدسمه محفز وباعث للنشاط وخطأ حسن شحاته باللعب بمحمد شوقى بجوار حسام غالى وكيف ان الصداع يتبدد مع استخدام وصفة كذا

ادى العيش لخبازه

منذ 7 آلاف سنه وخباز مصر ينتظر ان يتعطف اى مصرى وينفعه لكن ازاى؟

احنا بتوع كله ...دماغنا شغاله فى كل حاجه

لانعترف فى بلدنا بمبدأ التخصص وان لكل دوره وعمله فى الحياه يجتهد ليؤديه وتدخل الاخرين بشكل جائر يفسد هذا العمل .اما فى الاشياء التى تستلزم راينا وجهدنا فعلا نتراجع ونرفض المشاركه وتبدأ سلبيه اخرى

وهى انا مالى انتظر ان يكتب عنها احدكم

ساكتب الايميل فى التعليقات وانتظر تفاعلكم

16 comments:

e7na said...

e7nablog@yahoo.com
مستنيين المشاركات

g_bouheerade said...

الحلقة اولى انطلاقة موفقة

لاننا كدا جبنا الشخصية المصرية الغالبة والمنتشرة وحطيناها قدامنا

عايزين نبدا بقى تشريح ونعرف ايه الاسباب التى ادت لوفاة الشخصية المصرية
التى حسب ادعاءها يجب ان تكون معمرة
حضاريا وتصمد وتتحدى كل صعب

عارف انا عندي واقعة مناسبة جدا لمبدا وانا مالي
ومجرد ما اكتبه هابعته على طول

ابوزياد الفاتح said...
This comment has been removed by the author.
ابوزياد الفاتح said...

نتعليق بسيط بس
الدين اختى لا يجب ان يتجزء عن حياتنا
فهو جزء منها
مش ينفع نجزء الدين
ووقت نتكلم فيه ووقت لاء
لا مينفعش طبعا
لازم الدين يكون معانا فى كل وقت
وايه المانع نكون لنا فى كل حاجه
علماء زمان كانو علماء موسوعيين
لهم فى شتى العلوم
ليه منكونش زيهم يعنى
والكلام فى الدين او فى السايه مش عيب
لازم نكون على علم بكل شىء
السلام عليكم

عبده الميكانيكى said...

ياريت تقنعوا اللى بيصلح العربيه من غير ميكانيكى يحترم نفسه وبلاش يقطع ارزاق الناس
بلوج ورائع ومعبر فى كلمات

منة الله said...

e7na

ادعوك للمشاركة في استطلاع راي

عن اكثر عشرة مدونات تاثيرا في قرائها

عل مدونتك واحدة منهم

اليك الرابط

http://www.6ef.blogspot.com/

fanan fa2eer said...

المصريين فعلا بيدخلوا في اللي لهم واللي مالهمش فيه
لكن برده أرجع ده الي نوع من أنواع الكسل للجوء للمتخصصين اما للتكلفة المادية أو التكلفة الذهنية أو البدنية
أو لعدم ثقتهم في المتخصصين دول بيلاقوا كل متخصص له رأي مختلف عن الآخر مع انهم داخل تخصص واحد وده بيؤدي الي التشتت وعدم الثقة
وده راجع لنواحي كتيرة مش سبب واحد ولو حبينا نحل الموضوع ده هيبقي لازم نحله من كل أطرافه الفرد والمجتمع والمتخصصين أنفسهم

Spyfun said...

لاتعليق علي كلامك بس انا مش شايف امل في التغير دي طبيعه باين مش عارف
تحياتي لاسلوبك الرائع

انتظار مؤقت said...

ده الي بسموه البني ادم الكشكول بتاع كلو الي عمرو مافهم يعني ايه تخصص ..محاسب شغال صيدلي بتاع اداب شغال في فرن محامي على تكس و هكذا ..
تحياتي

rana 3amra said...

انا سعات بحس ان موضوع بتاع كله دة حاجة لا ارادية
اه والله كانه مرض عضال
بس عموما دى حاجة كبيرة كدة زى الوحمة اللى بتعلم الشعب المصرى
مدونتكم عسولة ربنا يوفقكم وانا كمان يا رب

BaTresYa said...

على فكرة الموضوع دا مش موجود في المصريين بشكل عام...موجود في الرجاله بس ...لأن الراجل بطبيعته ميحبش راجل تاني يتفوق عليه في حاجه ...يعني اشمعنى اجيب سباكـ هو انا يعني معرفش اصلح البلاعه ...وليه نجيب كهربائي مش هعرف انا اعمل اللي هو هيعمله ...وممكن دي نبعه من ثقة الرجل بنفسه ..أنا مش حيادية بس انا سمعت الكلام دا من كذا اخصائي NLP

قطر الندي said...

واحده زيي مثلاً لا ممكن ابداً اقول ماعرفش غير لما اجرب كل الحيل كهربا تليفونات سباكه بتاعة كله و لما تسألني عن السبب اقولك اني باحس باني سعيده جداً لو نجحت في تصليح الحاجه علشان كدا مش باستسلم بسرعهغير لما الحاجه تخرب خالص بقي لو لقيت دوا للموضوع دا ابقي قولي عليه

wael said...

الفكره ساعات مش بتبقى فهلوه قد ما هي غلب يعني توضيحا للكلام نص اللي بيصلحو الحاجات لنفسهم اذا ما كانش اكتر اتبهدلو كتير من السباك و الميكانيكي وغيرهم فبشكل عام اتخنق من كونه مستغل من كل البشر اللي على ضهر البطاقه عندهم كلمة مصري
المهم الشعب المصري شعب خلق ليكون بهذا المنظر ومش هيتغير
رجاء صغير :
فونت الكتابه قرب يعميني معلش غيره حفاظا على نظرنا

e7na said...

انا مش لاقى تفسير للداء ده وواضح من التعليقات انه منتشر فعلا وان كانت اسبابه مستتره
حد عنده حل يا اولاد الحلال
ولا هنفضل نرصد الظواهر وبس

Rodrigo said...

Oi, achei teu blog pelo google tá bem interessante gostei desse post. Quando der dá uma passada pelo meu blog, é sobre camisetas personalizadas, mostra passo a passo como criar uma camiseta personalizada bem maneira. Até mais.

break said...

اولا هوا تحليل موفق جدا لاوضاع المصريين
وخاصة الرجالة
لان فعلا الرجالة هما اللى بيحبو يعملو نفسهم بيفهموا فكل حاجة

تحياتى وفى انتظار الحلقة الجاية