Monday, March 2, 2009

ثلاث حكايات وميكروباص

دى الحاجه الوحيده الباقيه لى

انتهبت لكلماته فاوقفت غناء فيروز فى السماعات والتفت له..كان يبدأ الحوار بمثابة اعتذار عن وقوع الجوال الملطخ بالدماء الذى يحمله على بنطلونى

الصيد ده بقى يا ابنى احلى حاجه فى الدنيا

نظرت للبندقيه التى يحتضنها بحنان شديد كانت قسمات وجهه توحى بكبر سن شديد لا يتناسب مع نشاطه وبنطلونه الجينز وروحه المرحه التى يتعامل بها مع كل الركاب

انا يا ابنى طول عمرى اصحى الفجر اصلى واطلع بالبندقيه وارجع اروح شغلى لكن بعد المعاش بقى بقيت اقضى الوقت من الصبح لغاية الضهر فى الصيد وارجع لام العيال باللى جبته تبيع شويه وتطبخ لنا شويه

تركت الكتاب والسماعات والتفت له بكل حواسى

انا ناس كتير بقت بتجى لى اصلح لها البنادق عارف انت معوض اللى فى السوق

اومأت برأسى ايجابا

ده لما بيستعصى عليه بندقيه يجيبها لى اصلحها ..عارف ؟؟ انت اسمك ايه صحيح؟

- أحمد

شوف يا احمد الصيد ده عيشه تانيه مش طلقتين فى الهوا كده ومش قتل برضه وقت الصيد ده بتشوف قدرة ربنا وخلقه العجيب

انا الوقتى اقف تحت الشجره ابقى عارف الانواع اللى عليها ابص لامؤاخذه على فضلة الطير اللى على الارض اعرف بقى له كام يوم على الفروع

انا نازل هنا اتفضل معايا

-شكرا يا حاج

مع السلامه يا ابنى .. ايوه يا معلم معاك هنا

لوح بكفه لى بعد أن نزل من السياره والتفت لأراه وهو يعبر الطريق

....

اقعدى جنب عمو

أجلستها جوارى وابتسمت لى ....كانت البنت ترتدى نظاره طبيه وتتلفت بخجل شديد

اقتربت من امها وهمست لها

ردت الأم بصوت اعلى نسبيا :

لا هو قال فى المذاكره والتلفزيون والكمبيوتر وتقعدى بعيد وتحافظى عليها لاحسن تتكسر وتحطى القطره كل يوم

تضاعف خجل البنت ونظرت لى لتستكشف هل سمعت كلام الام ام لا

......

أكثر المواقف المحرجه لى هى (لم الأجره ) فقدرتى على الحساب تدعو للشفقه

أنقذتنى مبادرة هذا الشاب من الحرج أعطيته اجرتى فاستفهم بسبابته هل هى اجره واحد أم لا؟

اتبع نفس الاجراء مع باقى السياره بعد أن أعاد لى الباقى

حينما طلب منى بالاشاره ان أجلب له أجره الكرسى الاخير فى السياره

ناولتها له فشكرا باشاره وابتسامه

لم يلحظ أحد ذلك سوى أنا والسائق وبعد دقائق نبه السائق باشاره فى كتفه أنه يريد النزول ودعه السائق وأشار لى بود واغلق باب السياره

6 comments:

mohra said...

جميله و رقيقه كما هى جميله صور المناضلين..مثلك احب مطر و بنجامين باتون

شجره الدر said...

اشيا تحدث يوميا جعلت منها ملاحظاتك الذكيه مدونه رقيقه جميله
رائعه

بنت القمر said...

استمتعت بالحكي لكن الخلفية السوداء للمدونه مرهقة للعين ياعني لو امكن يعني
انك يعني....
:))
تفتحها
دمت بخير

خيرالدين said...

mohra
منوره يا دكتوره
ربنا يخليك
الفيلم جميل جدا
نفسى اكتب عنه

خيرالدين said...

شجرة الدر
شكرا جزيلا لمرورك واهتمامك بالتعليق

خيرالدين said...

بنت القمر
سلامة عيونك يا استاذه امانى
نفذنا تعليماتك