Friday, May 30, 2008

حقد تجاه أخى


لا اعرف سر هذه الحاله من الحقد تجاه أخى هذه الايام
ربما لهذه الوفره فى القنوات الفضائيه الخاصه به او لألبوم نانسى للاطفال دخل كبير فى ذلك
طبيعى جدا لجيل مثلى عانى عذابات طويله مع اصوات من عينة صفاء ابو السعود واشكال مثل محمد ثروت واغنيات مثل فى البحر سمكه لابد ان نشعر بالغيره القاتله حينما تغنى نانسى بكل ما أوتيت من جبروت لأخى شاطر شاطر او حينما تعجز هيفاء امام طفلة فى الشارع اللى ورانا وتقول لها انا عندى بغبغان
كانت عفاف راضى وبدايات أنغام من اول الاشياء التى اسمعها خاصة اغنيه انغام لالى وهى المرحله التى يصفها الكاتب باسم شرف بان انغام لم تكن قد حددت بعد هل ستصبح ذكرا ام انثى
اما عن الاعمال الدراميه فقد احتملت كثيرا من احمد عبد العزيز الى ان قام بدور جمال مبارك مؤخرا فزادت معزته فى قلبى
وفى قلبى كثيرا من الكراهيه تجاه فردوس عبد الحميد واذكر برنامج ابيض واسود يوم الاثنين برعب شديد غير طبعا ناديه الجندى آكلة الرجال كما يقول مدون زميل او نبيله عبيده او البشعه الهام شاهين بينما اخى يطاوعه قلبه ان يجد سولاف فواخرجى على الشاشه وينتقل لقناه اخرى
طبعا .........ماهو لو كان جرب ايام القناه الاولى والتانيه وحياه عبدون وهى بتعايرك وتقول لك انك لن تدير مؤشر القناه الثانيه(هاديره اروح فين؟؟) ولا تعامل مع مقدمات فاطمه الكسبانى المطوله التى تجعلك تصرف نظر عن مشاهدة التلفزيون بقية اليوم
يجلس اخى بكل غرور وعنجهيه يتنقل بين سبايس تون والجزيره للاطفال وتينز بينما انا واطفال الشارع كنا نلجأ فى أحد المنازل لننتظر كابتن ماجد حتى منتصف الليل ونحن ندعو الله الا تداهمنا اهم الانباء فتضيع السهره
اخى وكل عيال الشارع هشام وساره واحمد ومحمد وحتى شذى الرخمه
أنا باحقد عليكم

11 comments:

mohra said...

يا ساتر على الناس يا جدع...كأنك بتحكى عن طفولتى بالظبط...بس انا كنت بحب صفاء ابو السعود
عامه ممكن تتفرج على سبايس تون دلوقت ما حدش هايمنعك :)

... said...

فعلا فعلا عندك حق
كنت زيك بالضبط بس انت نسيت حاجات حلوة كانت بجد حلوة زي ماما نجوي وبابا ماجد
صحيح لو شافوهم ولادي دلوقتي ممكن يطلبوا حق اللجوء الاجتماعي لبيت تاني
بس دة كان الموجود
احقد براحتك بس ممكن تعوض وتتفرج عادي يعني

دكتور كسلان said...

عندك حق يا ابو حميد
بس انت نسيت برامج مهمة جدا
عروستى وسينما الاطفال
غير برامج القناة التانية
حدث بالفعل وبانورما فرنسية
وبرنامج ايام وليالى اللى كنا بنستناه يوم الجمعة عشان نعرف افلام الاسبوع

ونسيت المقولة الشهيرة لفاطمة الكسبانى قبل كل ماتش
العقل السليم فى الجسم السليم
طب كانوا يختاروا واحدة جسمها سليم

وبعدين انت لازم تحرق دمى
وتجيب سيرة شذى
وخلتنى اكتب اسمها كمان

بالمناسبة دى تتمنى ايه
وتحب تسمع ايه
تخيل احمد مختار وهو بيقولك الكلمة دى فى برنامج امانى واغانى

انا عن نفسى عايز اسمع اغنية ما بلاش نتكلم فى الماضى
الماضى ده كان كله جراح
خصوصا شذى

سلااااااااااااااااااااااااااااااااااام

رحــــيـل said...

ههههههههههههههه

احمد احنا مكناش اطفاال بجد
ولاهما اللى مش اطفال
مش عارفه بس بجد
فرق كبير جدا بينا وبينهم مع ان فرق السنين مش مهوول يعنى

انا اخرى كان الاولى والتانيه
قاطعت التلفزيووون
واهلا بالنت

تحياتى

Anonymous said...

looooooooooooooooool

طيب تصدق بقي

اني عكسك بأسف ع العيال دي

امبارح والله باقلب لقيت سبيس تون وعليه ميييييييييين

كابتن ماااااااااجد انبسطت جدا
هبة تقولي يا بنتي غيري القناة هاتي حاجة عدلة وقلت لا ح اشوفه يعني ح اشوفه

انما ايه جيل هانا مونتانا
و سباي جيرلز
وحاجة كمان مش فاكرة هي ايه برضه رخمة كدة

فين ايام اغاني نيلي
وصفاء ابو السعود
ومحمد ثروت
وهي القناة والاولي والتانية
مش القنوااااااات الكتيييييير اللي تزغلل العين والعيال تاهت وسطهم

صدقني انا بأسف عليها

ااااه والنيلة بتاعهم ده اسمه
high school musical :D

weswes said...

ايه ده انا كنت فاكره ان انا لوحدى اللى كده
لما بحق على بنت خالى رؤى وهى هايصه فى القنوات دى
كويس انك طمنتنى على نفسى

Anonymous said...

I could give my own opinion with your topic that is not boring for me.

خيرالدين said...

mohra

صفاء ابو السعود
هيه هيه هيه
يا ستى حرام عليك
ده انا ما فهمتش سعدنا بيها
غير السنه اللى فاتت
ربنا يجازيها

بثينه
باتفرج طبعا
وباتحسر على ايامى
وباحقد
شفتى بقى

خيرالدين said...

دكتور كسلان
طبعا امانى واغانى من الحاجات التاريخيه
وسينما الاطفال
ده احنا كنا بنشوف ايام سوده


رحيل

لا ياساره
احنا لا اطفال ولاهما اطفال
بس احنا اتعذبنا
وهما
ربنا يزيدهم

خيرالدين said...

epitaph

انت عارفه يا هاجر
انا لما بافتكر شعورى وخنقتى لما النور يقطع
واقعد متضايق
طيب على ايه
علشان لما النور يرجع اشوف القناه الاولى والتانيه
بجد كانت عذابات


لا طبعا هم محظوظين
اه

خيرالدين said...

weswes


لا يا وسام
ده شعور صحى جدا
وطبيعى خالص