Saturday, October 27, 2007

الدراما من جديد


مرت سنوات عديده لم ينل فيها عمل درامى مثل تلك الشهره وردود الافعال فى أوساط المثقفين والعامه كتلك التى انتظرت مسلسل الملك فاروق
المسلسل الذى هز عرش مصر
هكذا راته الدستور (المثيره للجدل هى الاخرى)ولم تتحدث عن المسلسل فقط فى صفحاتها الفنيه فقد كان من نصيب الملك الحقيقى والملك الدرامى عدد خاص فى العاشر من اكتوبر احتلت صورة فاروق صفحته الاولى وضمت باقى الصفحات حديثا عن مراحل حياته المختلفه وصور عديده وضم هامش الجريده أشعار وأغنيات قدمها عظام مصر للملك
المصرى اليوم هى الاخرى قدمت فى عدد الحادى عشر من أكتوبر عدد خاص عن الملك والمسلسل تناولت فيه آراء عدد من أساتذة التاريخ...د.يونان لبيب رزق ...د.لطيفه سالم ...وعدد من الشخصيات السياسيه مثل د.فؤاد بدرواى نائب رئيس الوفد الذى رأى ان المسلسل قدم الحزب الاعرق فى مصر بصورة صداقه
للشباب أيضا كلمه
حاله من الذهول والضيق انتابت أوساطا لشباب المصرى الذى تملكته الحيره بعد المسلسل فالتاريخ الذى درسه صور له هذا الرجل انه زير نساء وعربيد وأمه لاتختلف عنه كثيرا وأن ملائكة الثوره جاءوا ليخلصونا من فساده هو ومصطفى النحاس
وتساءلوا
هل كذب المؤرخون علينا فى أشياء اخرى
الجانب الاخر
المسلسل الذى رفضت الجهات الحكوميه انتاجه من قبل ورفضت عرضه بعد ان انتجته م بى سى انتظرته حاله من الهجوم فى الاوساط الحكوميه فرأى البعض أنه دعوه للعوده الى الملكيه واتهم البعض المملكه السعوديه بتمويل المسلسل لتلميع الملكيه وتشويه الزعيم جمال عبد الناصر
فريق العمل
الكاتبه لميس جابر رأت ان نجاحها فى المسلسل جاء لانها لم تشعر الخوف وهى تكتب المسلسل وأنها كشفت جريمه ارتكبها من شوهوا صوره فاروق
فى حين رأى صلاح عبدالله انه قدم فى شخصية مصطفى النحاس دور مهم فى تاريخه الفنى ..اما نبيل الحلفاوى فرأى انه اجتهد فى تقديم شخصيه رئيس الوزراء على ماهر الا انه لم تخرج تماما كما تمنى أما وفاء عامر والتى قدمت دورا رائعا اختلف عن كل ادوارها السابقه فقد قام موقع حماسنا برفع اسمها من قائمته لفنانات العرى بعد تألقها فى المسلسل

34 comments:

أبوسويلم said...

صحيح انى ما تابعتش المسلسل
لكنى استهجنت جدا تصوير فاروق على انه غير سوى نفسيا ودائما عصبى ومضطرب او غير موزون
بالعودة للتاريخ والواقع
فاروق ظلم كثيرا كشخص وكملك
واقدر اقول وانا واثق من كلامى
ان عهد فاروق افضل من عهود
جمال والسادات ومبارك
وده كفاية

rainbow said...

الاخ العزيز احمد
تحليلك على اختصاره مس النقاط الرئيسية لهذا العمل فنيا كمسلسل ابدع كل اطرافه من اخراج الى تمثيل الى ملابس .. وشمل تسليط الضوء على جانب آخر يضايق الجميع وهو ما تعلمناه واختلافه عن الحقيقة وكيف يتم تزوير التاريخ لرفع اسماء وخسف اسماء اخرى بغض النظر عن ان طمس التاريخ يستحيل مهما طال الزمن .. وهذا ما يحدث الان نتحدث عن الماضى بحنين كبير وعن الملك الذى كان يتم ( تظليل ) صوره فى افلامنا الابيض والاسود على انه انسان .. ونجحت الكاتبة المبدعة لميس جابر فى اهدائنا متعة النظر من خلال هذه الشاشة على التاريخ الحقيقى ..
فتحية لك على عرضك الشامل
وتحية لكل من عمل بهذا المسلسل
هدى

قطوف said...

بجد وفاء عامر قدمت دور أكتر مر رائع بجد اثبتت انها ممثله رائعه
انا تابعت المسلسل مره ومتابعه فى الاعاده حاكم يا أحمد انا مبكذبش

Unknown said...

هو فعلا كان مسلسل اكتر من رائع

بس هو مكنتش تمجيد للملكيه خصوصا اننا عايشين في عصر الملكيه المقنعه

علي الأقل هو كان ملك بجد

عادي انه يكون مابيعجبش الحكومه لأنها مش ممكن تعترف انها غلط وانها جت مع نظام اتبني علي ظلم انسان وتشويه صورته


السعوديه مش هي اللي انتجت المسلسل

اللي انتجه الوليد بن طلال صاحب ال mbc واي حد قرأ كتاب الوليد او يعرف عنه اي حاجه هيعرف انه راجل مش بيحط فلوسه في حاجه خسرانه

يعني المحطه لو مكنتش متأكده ان المسلسل كويس مكنتش هتنتجه بغض النظر هو كان بيتكلم عن مصر ولا بلاد ماوراء النهر

ta5areef said...

انا زى ابو سويلم

ماشوفتش المسلسل
بس كل اللى اعرفه ان اى رئيس او ملك له عيوبه زى ماله مميزاته

يعنى اكيد الملك فاروق عمل حاجات حلوة احنا ماعرفنهاش

زى ماكل ريس عمل حاجة حلوة مخلية له مؤيدين

هه؟؟

Anonymous said...

عارف اجمل حاجه فى المسلسل ايييه؟انهم قالوا ان الزمالك كسب الاعلى 6/0فى نهائى الاس

Coca said...

انا متفرجتش علي المسلسل في رمضلان وبدات اتفرج عليه دلوقتي بس الموضو اكدلي فكره في دماغي عن تزييف التاريخ لان كتير جدا بيوصلنا تاريخ مشوه غير صحيح
لقيت نفسي متعاطفه مع الملك فاروق في بعض الاحبان لاني حسيت انه محطوط في مكان مش مكانه وقدرات لا تؤهله لملك
وانا رافضه اصلا فكره الملكيه والمسلسل اكدي خطورتها ولم يأتي المسلسل مشجعا علي فكره الملكيه
تحياتي بوست جميل يختف عن كل اللي اتكلموا علي المسلسل

Sara Swidan said...

عندي إهداء ليك يا أحمد..

بس هتوه شوية !!
:)

لسة ما قريتش البوست دة ، بس أول ما حقراه حعلَّق عليه تاني ..

شكراً شكراً

Doaa Ebrahim Aaql said...

بصراحة أنا مشفتش المسلسل
لكن أنا مبقتش أثق عموما
فى مصداقية أى عمل بيتكلم
عن سيرة ذاتية
لأن للأسف المصالح والاعتبارات
بقت أساس كل التعاملات
مع إن الفن اساسا لابد أن يكون نبيلاً
وبعيد كل البعد عن تلك الأمور

**********

تحياتى

رحــــيـل said...

انا مشفتش المسلسل
ولا كنت متابعه
اى مسلسل فى رمضان
بس بصراحه من كتر الضجه اللى حصلت حواليه احتمال افكر اشوفه
خالص تحياتى

The Alien said...

من حيث إنه إتضحك علينا ف إحنا مضحوك علينا ف حاجات كتير
واللي عمله المسلسل إنه لفت نظر الناس لإنه مضحوك عليهم
وخلي الناس تسأل وتدور علي الحقيقة

المشكلة إن التاريخ المفروض يكُتب بشكل مجرد من أي إنتماء أو رأي للمؤرخ ودا مش بيحصل عندنا
التاريخ بتاع الفترة دي كتبه الناس اللي عملت إنقلاب علي الملك
وإحنا شفنا الفترة دي من وجهة نظر واحدة
المسلسل كشف حقيقة إن التاريخ عندنا مش سليم
بس مش معني كدا إن كل اللي جه ف المسلسل حقيقة!

تحياتي

nezoo said...

بص يابو حميد لو عايز تتفرج على عمل درامي مصري انصحك انك تتفرج على الحاجات اللي بتقطع القلب لان احنا بارعين اوي فيها او تتفرج على الكوميدي انما تاريخي اوعى تفكر تتفرج على حاجه مصري لان اللي بيكتب هنا بيكتب حسب ميوله ومصالحه اتفرج على المسلسلات التاريخيه السوريه وساعتها هتعرف الفرق وشكرا على الموضوع

weswes said...

انا معترضه ان الشباب تتصدم
هو يعنى كان من المفروض نصدق كلام اتكتب عن الملك فى عز ازدهار الثوره
هذا غير منطقى
اما العمل فكان رائع
وعن كونه قدم فاروق على انه مضطرب انفعاليا
فده شئ طبيعى جدا اى واحد عادى لو فى اسرته مثل الذى فى اسرة فاروق بالاضافه الى نوع وطريقه التربيه كانت لازم تخلق عنده توتر يصاحب شخصيته

(green eyes) said...

انا عن نفسي عجبني المسلسل جدا
لان كل الاعمال الدراميه اللي كانت قبل كدا كانت بتصورلنا الملك فاروق على انه مستهتر ومالوش في حاجه غير الستات وبس ودا غلط
وانا شايفة ان مصر في عصر الملكية كانت احسن بكتير من الجمهورية اللي احنا شاهدين مساوئها انهاردة
هو انا ماعشتش العصر دا بالفعل بس اكيد كلنا قرينا عن الانجازات اللي مصر كانت بتحققها في الوقت دا

خلود صلاح said...

هههههههههههههههه
مصر تحرجنى وتتكلم فى حاجات ماليش فيها
مبحبش التلفزيون يااحمد ههههههههه
بس مش ينفع اجى لحد هنا ومعلقش
انت اخبارك ايه؟؟ واحشنا يا راجل

Anonymous said...

هو المسلسل ده ليه ميزه جامده قوى الا وهى القاء حجر فى مياه التاريخ الراكده علشان نتسال بجد تاريخ مصر بيتكتب ازاى ومين الى بيكتب وليه

BaTresYa said...

والله هو المسلسل كان رائع كتمثيل واخراج وموشيقى وكل حاجه حتى وفاء عامر مش بطقها بس بجد حبيت دورها في الملكه نازلي ادقنته جدا وتيم حسين بجد ممثل متميز وحببني في الملك فاروق بجد المسلسل ده خلاني ابحدث في تارخ الملك فاروق...بوست جميل اوي

خيرالدين said...

ابو سويلم

على الاقل كنا عارفين انها ملكيه
انما دلوقتى ولا حد عارف حاجه


rainbow
استاذه هدى
شكرا على الكلام الجميل ده

سى السيد
عارف
عارف
انت هتقول لى

خيرالدين said...

esraa

على فكره انت من الناس اللى تناولوا الموضوع بشكل جميل جدا
اشكرا على الزياره واتمنى المداومه

تخاريف دكتور

يمكن تكون الحسنه الوحيده للنظام الحالى
غير الكبارى
هى حرية الصحافه
والحمد لله بدأ يكتشف خطأه ويتراجع عنها

zelaky
يا سلام يا باشا لو نرجع زى الايام دى

خيرالدين said...

coca
تحريك المسلسل لفكر اى منا سواء كنا مع طريقة التناول او ضدها ؤكد ان المسلسل نجح
لانه مختلف

شكرا لزيارتك وتعليقك الجميل

sara swidan
شكار على الاهداء الجميل يا صديقتى الرقيقه


princess dodo

عارفه ليه يا دعاء
عندك مثلا مسلسل ام كلثوم قدمها على انها ملاك نازل من السما
وغيره كتير

خيرالدين said...

ra7eel
اكيد ضرورى تشوفيه
لانه زما قلت مختلف

the alien
زى ما انت قلت
مش كل اللى فى المسلسل حقائق
هو اجتهاد


nezoo
حصل وبعدها عرفت ان اللى بيحصل فى مصر
اسمه
عك

خيرالدين said...

weswes
اغلب المعلومات عن الفتره دى وصلت لنا فى سن الطفوله من كتب الدراسات الاجتماعيه
ده غير ان الاعلام كمان ساهم وبالحاح فى تأكيد الصوره دى لحد ما انطبعت فى عقولنا


green eyes

طبعا احسن
هى فين الجمهوريه دى



خلود صلاح
اسفين يا جميل
تمام الحمد لله
اخبارك انت

خيرالدين said...

رئيس جمهورية نفسى
تعليقاتك بجد مميزه

ونبدأ فعلا ندور على كل تفصيله وكل حاجه وصلتل انا فى ايه فيها غلط وايه صح
ومين الى كتب ده


batresya

منوره
ايه الغيبه دى


شكرا على الزياره

علوة said...

يا هلا
أولا انا مش عارف مين اللي كتب الموضوع بالظبط من الدستور
وثانيا مشفتش المسلسل
وثالثا وده الأهم
انا معرفش الملك فاروق

بس ايه الدستور المثيرة للجدل دي ؟
م بلاش اللون ده معانا يا زعيم
انت فاكرنا النبأ ولا الحوادث ؟

حتة جد
التاريخ فعلا مليان بالأكاذيب بدليل انتصار اكتوبر العظيم
مكانش في اكتوبر ولا حاجة
ده كان في أول فيصل
!!

صباح الفل بطعم الفراولة

Abeer said...

بصراحة هو مسلسل جامد
بس احنا هنتكلم من ناحية ايه نقد فني
ولا نقد تاريخي

النقد الفني .. مسلسل كان رائع من ناحية اختيار الممثلين .. التمويل .. الاخراج
تيم حسن ابدع فعلا

من ناحية التاريخ
فالمسلسل مليان غلطات تاريخية .. وفي حاجات كتير سقطط
سهوا او بقصد الله اعلم
بس اهي بداية كويسة

خيرالدين said...

علوه
احنا نقدر نغلط فى الدستور يا كبير دول حبايبنا واساتذتنا وتاج راسنا

شكرا على المعلومات
والفراوله

زيارتك تسرنا


عبير
يادى الهنا
طبعا لازم يكون فيه أخطاء بس مش بحجم الاعمال اللى تناولت الفتره دى قبل كده

Rosa said...

أنا ما شفتش المسلسل الا انه مش فارسني حاجة الا الجهات الحكومية التي رأت في المسلسل دعوة للعودة للملكية. هم مش دارينين بعيشتهم دول؟ هو في ملكية أكتر من اللي احنا فيها؟ و لا في ملك جه على مصر قعد قد اللي قاعد دا؟

لو كدا يبقى أيام الملوك كانت أحسن و يا رب ترجع تاني يااااااااااا رب!!!

ما علينا said...

ممكن اعلق؟
؟
؟

هاعلق بقى وانا كلي ثقة انك
ملتمس لي العذر في التأخير

لان البوست دا والله انا كتبت عليه تعليق وكان اول تعليق
وكان تعليق طويل
وقبل النشر بمفيش الجهاز قطع مني ميه ونور

ومن يومها وهو على كدا بيفصل مني ومش بالحق اكتب حاجة

ودخلت وحاولت اعلق تاني
ولكن نفس الحكاية كل مرة


المهم ربنا يسهل ويستجدع معايا وما يفصلش

بالنسبة للملك فاروق

انا شخصيا عمري ما كرهته
لكن في عصره كرهت الاحتلال
هو مسك البلد وهي اوضاعها زفت
صحيح له عيوبه كحاكم ومش هو اصلح الحكام

واكيد مش بالصورة اللي لمسلسل عارض شخصيته بيها

لان واضح جدا ان المسلسل متبني شخصيته بشكل انساني متعاطف مع فاروق كانسان

اكثر من محاولة عرض الشخصية بموضوعية مطلوبة في مثل هذه الاعمال

لكن عامة
انا وجهة نظري الشخصية
قانعه
ان ايام الملكية ارحم بكتير من اللي احنا فيه

وباشوف ان ثورة الضباط الاحرار
برغم فرحة ناس كتير جدا بيها
الا اني باشوف انها كانت ثورة
قضت على اي عقل او رأس مفكر

وان حكام الثورة كانوا قمة الديكتاتورية والتعنت

واعتبروا البلد العزبة اللي كسبوها بعد مبارزة ولا لعبة قمار

وكانها مكسب شخصي لهم استحقوه عن جدارة
لكونهم هم من قام بالثورة

ومن يومها والبلد
تخلصت من الاحتلال الانجليزي
ووقعت تحت طائلة الاحتلال البلدي

مش ايام الملك كان في حرية اكتر من دلوقت


كلامي طبعا ليس معتمدا على المسلسل
لاني ابدا لا اثق في اي احداث تاريخية
تعرض في اعمال درامية
تعرض وتتبنى وجهة نظر شخصية غالبا

ومش ابدا مع الناس اللي ما كانوش يعرفوا اجة عن فاروق
واعتمدوا في حكمهم عليه على المسلسل

التاريخ والاحداث لها كتب
ومش كل الكتب مضللة يا جماعة

و احنا لنا عقل نقرا كل المتاح ونربط الامور ببعضها


اما عن العمل كدراما تمثيلية فهو عمل جميل جدا
انا لم اشاهده في رمضان
ولكن اصادف منه بضع حلقات حاليا

اتمنى التعليق دا يشفع لي

وان شاء الله
يوصل

خيرالدين said...

ام هاجر
على رايك
لما ولى العهد يتولى الحكم ان شاء الله هيرجعنا للايام دى
نورتينا


ماعلينا
زعلان منك
بجد
بقى تعليقاتك تغيب عن المدونه الوقت ده كله واما ترجعى تسالى ممكن اعلق ولا لا
المشكله يا جميله ان الوصول لكتب تاريخيه اخطائها قليله زى الوصول للشغل فى يوم فيه موكب لمبارك
شفتى سهل ازاى

ما علينا said...

احمد

كدا انت اللي زعلتني بجد والله

انت مش مصدقني
انا والله كنت اول تعليق على البوست دا

لاني متعودة اول ما ادخل نت بادخل عندك الاول
وقبل ما اخرج من النت
بادخل لاني عارفة انك احيانا بتنزل حاجات في وقت متأخر

لكن والله العظيم الجهاز عندي مبهدلني
وكملت بالنت اللي تقل وبيفصل عمال على بطال

طيب اديني
قريت ردك امبارح
وزعلت جدا جدا
بسطبعا ما عرفتش اكتب اي حاجة
لان الجهاز كان بيفصل مني كل شوية



لالالالالالالالالالالالالالالالالا


كدا مش ملتمس لي العذر

وبعدين ما انا علقت

هو انا كنت مش هاعلق

حتى لو انت قلت لي ماتعلقيش هاعلق

دا انا اغتت شخصية في المنطقة دي كلها

غتته غتته يعني مفيش كلام

loumi said...

العزيز أحمد
بصراحه المسلسل رائع من كل النواحي
و أكيد ناس كتير حتعيد قراءة التاريخ مرة أخرى بعد مشاهدتها للمسلسل
لكن يبقا السؤال المحير
أين الحقيقه؟
لا شك أن فاروق بشر له محاسن وعيوب
ولا شك أيضا أن من أراد إظهار فاروق بصورة السكير العربيد كانت له أغراض معروفه
فلا هو ملاك ولا كل من جاء بعده كذلك
والشعوب هي المتضررة فى كل الأحوال
سواء كان حكم ملكي او جمهوري
طالما النظام فاسد

تحياتي
تصدق ما كنتش أعرف إن في مواقع متخصصه فى تصنيف الممثلات
بس بصراحه وفاء عامر أثبتت جدارة فى هذا الدور
وكل أفراد المسلسل بلا إستثناء
وأظن إن ده يرجع بدرجه كبيره للمخرج والإنتاج القائم على المسلسل
فنحن لم نشاهد هؤلاء الممثلين على هذه الدرجه من الإتقان والبراعه
من قبل

كلاكيت تاني مره
تحياتي

خيرالدين said...

ماعلينا
صدقتك والله
وبجد انت من الشخصيات اللى اعتز بمعرفتهم واتمنى انها تدوم

ومش زعلان بس
باعاتبك ولا مش من حقى

؟؟؟؟؟

loumi

المسلسل فعلا خطوه على طريق اعاده طريق اعادة قراءه التاريخ ولا ندعى انه افضل صوره لكنه محوله جيده

زيارتك واهتمامك بالتعليق على الموضوع أسعدنى

تحياتى

adhm said...

اخطاء مسلسل
فضيحة فى جناح ولى النعم
فاروق
جيش موجوع وشعب مجروح
ناس تانية اتخدعت
تحياتى

د/محمدعبدالغنى حسن حجر said...

أحبائى...
وهم وسراب يعيش فيه الكثير منا نخبة وعامة... كتّابا وقراء!!!! سواءا فى الكتابة المقروءة والمرئية والمسموعة ..مقالات وأفلام ومسلسلات وبرامج حوارية وهو أن ما يكتب يستطيع وحدة تغيير ثقافة الشعوب أو التأثير على الرأى العام وإحداث التغيير المنشود أو حتى يستطيع تغيير قناعة أمة أو أفراد ظلت ثابتة لقرون وأزمان !!!!
فنجد المدافعون والمؤيدون والوالهون فى حب كاتب أو مؤلف يتبارون دفاعا وسردا لمأثره عن جملة أقواله وأعماله مستشهدين بتجمع الناس حول عمل له متناسين أو متجاهلين لهوى النفس والغرض الذى يكون فى الغالب مرض ...
وعلى صعيد آخر نجد المهاجمون والناقدون للعمل الفنى أوالمقال يتبارون سردا للعيوب وتفنيد جملة الأعمال وربطها بإبتعاد وكره الناس لها متناسين أو متجاهلين أيضا هوى النفس والغرض الذى غالبا ما يكون مرض...
وهذا الفريق أو ذاك يتناسون أن العامة من الناس قد يندفعون حبا أو كرها للعمل مفردا أو المقال مجردا بعيدا عن الحب أو الكره للكاتب أوالصحفى وبعيدا عن جهلهم لقدره وعدم معرفتهم لجملة أعماله ولكن دافعهم للحب أو الكره يكون بصيص أمل أو صيد خاطر فى المقال أو القصة بجانب التأثر بالإبداع القصصى والإبهار البصرى وطريقة السرد وأبطال المقال والرواية وشخوص الممثلين وعلى هذا كان مقالى عن عملين للكاتبة د/ لميس جابر " الملك فاروق" والكاتب أ/يوسف معاطى "يتربى فى عزو"الذى نشر بالدستور المصرى فى 5/12/2007 التالى......

http://drmohamad555hotmailcom.blogspot.com/2008/08/blog-post_09.html

واليوم وبعد ما يقرب من العام أجدنى مازلت عند رأيى وقناعتى أن الحب والحنين لا يمكن أبدا أن يكون إلا لبصيص أمل فى كتابات الكاتب بالدرجة الأولى يدفع للأمل والرجاء فى غد يأتى بجديد ونكون أهل لهذا الأمل بجانب عوامل الإبداع والخداع البصرى وشخوص الرواية وأفكار المقال وسلاسة التعبير وقوة الألفاظ !!!!

وكذا الكره لايكون إلا لصيد خاطر فى المقال أو الرواية يدفع لليأس والإحباط والشعور بالكره لأحداث الرواية وأفكار المقال إذ بعدت عن ما يأمله الإنسان فى هذا الغد واتهامه للناس بأنهم ليسوا أهلا للأمل!!!!ثم بعد ذلك تأتى شخصية كاتب المقال أو القصة وأنانيته فى عرض أفكاره متحيزا لنفسه ورجاحة عقله وتمايزه بآرائه ومحاولته جعلها فرضا على الناس فى تحد لنقاط خلاف طبيعية ورؤى سياسية وحوارية جوهرية وامتنانه عليهم إذ عرض عليهم هذا الفكر !!!!بجانب تجاهله للآخر وقسمة العقول واختلاف الأذواق والفهم ...إضافة للثوابت العقائدية والموروثات الشعبية الذى قد تتعارض أو تتضاد مع هذا الفكر أو ذاك!!!

وعلى هذا بموضوعية وتجرد لابد لنا جميعا من وقفة مع النفس والعقل فنحّيد الهوى والذات " الأنانية"ونعلى شأن الحوار وقبول الآخرونسع كل خلاف ينشأ ونعمل قول الإمام الشافعى رحمه الله " قولى صواب يحتمل الخطأ فلا أعتز به جملة وتفصيلا بل أعطى مساحة لهذا الخطأ وقول غيرى خطأ يحتمل الصواب فلا أحقره وأعطى فرصة لهذا الصواب " ولا يغرنا تجمع الناس أو يحبطنا ابتعادهم لأن التجمع والحب أو البعاد والكره ليس شرطا فيه الإجادة أو الخطأ وإنما قد يكون ذلك نتيجة لصيد خاطر أو بصيص أمل!!!!