Sunday, April 12, 2009

احنا بتوع المصداقيه

زوجة الصحفى الكبير تخرج عن صمتها :يكره البطاطس ويرفض العدس ويهددنى بالرجوع لوالدتى

مصروف الاولاد لا يكفى ..الالف جنيه مش بتكمل يومين ...الزمن اتغير



انطلاقا من مصداقيتنا وحرصنا المسؤول عن كشف المستور لجمهورنا الحبيب لازلنا نوالى تحقيق الانفرادات والسبق متفوقين على صحافه السب والردح والتلقيح...جريدتنا اللى مفيش زيها ..الجامده قوى...الفل على الاخر

فى هذا الحوار الكاشف نقترب من دائرة الاحداث محاولين ازاحة النقاب عن الغامض على جمهورنا ...ليس لاننا صحافة فضائح ...لا ..ابسلوتلى...ولكن لان كشف مثل هذه الاحداث يوضح للقارىء كيف يتصرف الكاتب والصحفى فى حياته وكيف تؤثر هذه الاحداث على صنع الخبر والتحقيقيات..اى والنعمه

التقينا بحرم الاستاذ لنعرف حقيقه ما يدور فى منزل الرجل المحترم الاخير على وجه البسيطه ..رمز المصداقيه والنزاهه والشرف ..لانه احلى من الشرف مفيش

بادرناها بالسؤال عن طبيعة هذا الرجل الذى يشغل اهتمام كل المصريين الكادحين بصفته المدافع الاول عن حقوقهم

كيف يستيقظ الاستاذ من النوم ؟؟

والله الحقيقه هو بيتقلب كتير وهو نايم ..انت عارفه الشخصيات اللى زى كده بتبقى قلقانه دايما ...وبيصحى يشرب وينام تانى..والصبح بدرى بيتقلب قلبتين ويقوم

هل يؤثر ظهور الاستاذ كل ليله فى البرامج المسائيه على طبيعة عمله كصحفى ودوره كزوج ؟وهل تضايقك شعبيته وتأثيره وحب الناس له؟

بصراحه شغل الصحافه كان احسن بكتير لكن منها لله برامج التوك توك شو فتحت عينيه على ناس جديده وعيشه جديده

ازاى ؟؟

بيرجع من الاستوديو نفسه عافه الزاد ...يلاقى الصينيه عليها عدس وبيض سلقاه ومحمراه زغلايل وعامله السلطه ...يشخط ويزعق ويقول فين البطاط واللحمه

خلاص نفسه اتغيرت وكل يوم والتانى يشتكوا من خناقنا ده انا كل يوم والتانى عند الحاجه ومبنرجعش غير بوساطه الناس

وتفسرى بايه التغيير ده؟

والله يا اختى ما انا عارفه

طبعا اعزائى القراء بعد ان كشفنا لكم عن هذه التفاصيل نؤكد مره اخرى ان هذا ليس انتهاكا لخصوصية الرجل وانما بدافع الوصول للحقيقه ولانه ليس شخصا عاديا وانما اخباره ملك للعامه ونؤك كذلك ان حرم الاستاذ الكبير اشادت بصحيفتنا الجامده قوى وقالت فيها شعر لكن تفاديا لغيرة الزملاء فى الجرائد النص كم اللى عارفين نفسهم فضلنا عدم نشرها

7 comments:

mohra said...

هم يضحك و هم يبكى
ده يبكى....لقد سقط الكثيرين فى نظرى بعد هذه المأساه..و الله مأساه
ما هذا الفراغ الذى صار الناس فيه؟؟؟

Ola said...

هو ده بجد ولا انت بتتريق؟؟

alzaher said...

والاستاذ الكبير ده في انهي جرنان ؟

e7na said...

mohra

أقسى من المصيبه ...عدم الاحساس بها

e7na said...

ola

من ده على ده

e7na said...
This comment has been removed by the author.
e7na said...

alzaher

تحت كلمة رئيس التحرير فى نصف جرائد مصر